hameñ to sham.a ke donoñ sire jalāne haiñ

ġhazal bhī kahnī hai shab ko basar bhī karnā hai

hamein to shama ke donon sire jalane hain

ghazal bhi kahni hai shab ko basar bhi karna hai

sar-bulandī mirī tanhā.ī tak aa pahuñchī hai

maiñ vahāñ huuñ ki jahāñ koī nahīñ mere sivā

sar-bulandi meri tanhai tak aa pahunchi hai

main wahan hun ki jahan koi nahin mere siwa

suḳhan ke chaak meñ pinhāñ tumhārī chāhat hai

vagarna kūza-garī kī kise zarūrat hai

suKHan ke chaak mein pinhan tumhaari chahat hai

wagarna kuza-gari ki kise zarurat hai

unheñ ye zom ki be-sūd hai sadā-e-suḳhan

hameñ ye zid ki isī hāo-hū meñ phuul khile

unhen ye zom ki be-sud hai sada-e-suKHan

hamein ye zid ki isi hao-hu mein phul khile

zamīñ ke paas kisī dard kā ilaaj nahīñ

zamīn hai ki mire ahd kī siyāsat hai

zamin ke pas kisi dard ka ilaj nahin

zamin hai ki mere ahd ki siyasat hai

ḳhudā kare ye raushnī paḌe kabhī na maañd

gāloñ par vo likh gayā aadhe aadhe chāñd

KHuda kare ye raushni paDe kabhi na mand

galon par wo likh gaya aadhe aadhe chand

kis kis ko samjhā.egā ye nādānī chhoḌ

chehre ko sundar banā ā.īna mat toḌ

kis kis ko samjhaega ye nadani chhoD

chehre ko sundar bana aaina mat toD

sāvan aate hī baḌhe āvāzoñ kā zor

ḳhushbū chīḳhe Daal par rañg machā.eñ shor

sawan aate hi baDhe aawazon ka zor

KHushbu chiKHe Dal par rang machaen shor