ابھی سے مت مرے کردار کو مرا ہوا جان

ترے فسانے میں ذکر آئے گا دوبارا مرا

اک انتظار میں قائم ہے اس چراغ کی لو

اک اہتمام میں کمرے کا در کھلا ہوا ہے

ساتھ دینے کی بات سارے کریں

اور نبھائے کوئی کوئی مرے دوست

کوئی چراغ مری سمت بھی روانہ کرو

بہت دنوں سے اندھیرا مرے وجود میں ہے

مجھے اب آ گئے ہیں نفرتوں کے بیج بونے

سو میرا حق یہ بنتا ہے کہ سرداری کروں گا

یہ تیرا مال کسی روز ڈس ہی لے گا تجھے

اگر تو اس میں سے خیرات کچھ نہیں کرے گا

تھاموں گا نہیں اب کے مناجات کا دامن

دل تجھ سے اٹھا اور ترے در سے اٹھا میں

پہلے میری ذات میں تھا موجود کوئی

اب ہے میری ذات کا حصہ سناٹا

سو یوں ہوا کہ لگا قفل نطق و لب پہ مرے

میں تم سے مل کے بہت دیر تک رہا خاموش

مرا تمہارا تعلق بگڑ کے بن گیا ہے

مرے تمہارے خیالات کا امیں کوئی ہے