yādoñ kā ik hujūm thā tanhā nahīñ thī merī zaat

ḳhud-kalāmī meñ huī tamām shab unhīñ se baat

yaadon ka ek hujum tha tanha nahin thi meri zat

KHud-kalami mein hui tamam shab unhin se baat

nihāñ sī chādar kī silvaToñ meñ na jaane kitnī haqīqateñ haiñ

kahīñ to qisse visāl ke haiñ kahīñ sisaktī nadāmateñ haiñ

nihan si chadar ki silwaTon mein na jaane kitni haqiqaten hain

kahin to qisse visal ke hain kahin sisakti nadamaten hain

mire ham-safar mirī jān-e-jāñ kahūñ aur kyā

tirī qurbatoñ meñ haiñ dūriyāñ kahūñ aur kyā

mere ham-safar meri jaan-e-jaan kahun aur kya

teri qurbaton mein hain duriyan kahun aur kya

hai jiinā aur marnā jab akele hī to mere dil

kisī kā duur jaanā kyā kisī kā paas aana kyā

hai jina aur marna jab akele hi to mere dil

kisi ka dur jaana kya kisi ka pas aana kya

tumheñ 'ādat hai tum aksar mohabbat bhuul jaate ho

hameñ mā'lūm hai sab rāste tum par nahīñ rukte

tumhein 'adat hai tum aksar mohabbat bhul jate ho

hamein ma'lum hai sab raste tum par nahin rukte

na hoñ ḳhvāhisheñ na gila koī na jafā koī

na savāl ahd-e-vafā kā ho vahī ishq hai

na hon KHwahishen na gila koi na jafa koi

na sawal ahd-e-wafa ka ho wahi ishq hai

par katar paa.ī jab na ḳhvāboñ ke

bañd hī kar diiñ khiḌkiyāñ maiñ ne

par katar pai jab na KHwabon ke

band hi kar din khiDkiyan main ne

lamha-lamha rang badaltī duniyā meñ

tum chāho janmoñ ke rishte pāgal ho

lamha-lamha rang badalti duniya mein

tum chaho janmon ke rishte pagal ho

dafnā diyā thā jin ko gūñje haiñ har taraf ab

merī ḳhamoshiyoñ ko āvāz mil ga.ī hai

dafna diya tha jin ko gunje hain har taraf ab

meri KHamoshiyon ko aawaz mil gai hai

agar hai zindagī ik jashn to nā-mehrbāñ kyoñ hai

fasurda rang meñ Duubī huī har dāstāñ kyoñ hai

agar hai zindagi ek jashn to na-mehrban kyon hai

fasurda rang mein Dubi hui har dastan kyon hai

khīñch laayā tujhe ehsās-e-mohabbat mujh tak

ham-safar hone kā terā bhī irāda kab thā

khinch laya tujhe ehsas-e-mohabbat mujh tak

ham-safar hone ka tera bhi irada kab tha

manzil apnī DhūñD rahe ho

rasta duuje kā chalte ho

manzil apni DhunD rahe ho

rasta duje ka chalte ho

us kā va.ada hai lauT aane kā

aur mirā intizār kā va.ada

us ka wada hai lauT aane ka

aur mera intizar ka wada

ka.aba-o-dair meñ ab DhūñD rahī hai duniyā

jo dil-o-jān meñ bastā thā ḳhudā aur hī thā

kaba-o-dair mein ab DhunD rahi hai duniya

jo dil-o-jaan mein basta tha KHuda aur hi tha

chalo ik dūsre pe aaj ye ehsān hī kar deñ

ham apne biich kī duurī kā ab e'lān hī kar deñ

chalo ek dusre pe aaj ye ehsan hi kar den

hum apne bich ki duri ka ab e'lan hi kar den

bahut nibhāyā hai ham ne to zindagī tujh se

zarā milā bhī hai tujh se bahut baqāyā hai

bahut nibhaya hai hum ne to zindagi tujh se

zara mila bhi hai tujh se bahut baqaya hai

vo jo kahte haiñ ki un kā nahīñ dushman koī

un se pūchhe to koī aap ḳhudā haiñ kyā haiñ

wo jo kahte hain ki un ka nahin dushman koi

un se puchhe to koi aap KHuda hain kya hain

un ko ye shikāyat hai kī ham muḌ ke na aa.e

qadmoñ kī mire sust-ravī vo nahīñ samjhe

un ko ye shikayat hai ki hum muD ke na aae

qadmon ki mere sust-rawi wo nahin samjhe

barseñgī aaj rahmateñ aamad hai yaar kī

nāyāb haiñ ye ghaḌiyāñ tire intizār kī

barsengi aaj rahmaten aamad hai yar ki

nayab hain ye ghaDiyan tere intizar ki

tajdīd-e-zindagī ke ishāre hue to haiñ

kuchh pal sahī vo aaj hamāre hue to haiñ

tajdid-e-zindagi ke ishaare hue to hain

kuchh pal sahi wo aaj hamare hue to hain

badal kar aa.ina tum dekh lo kuchh bhī nahīñ hogā

kabhī vāzeh kabhī dhuñdlā magar sach phir vahī hogā

badal kar aaina tum dekh lo kuchh bhi nahin hoga

kabhi wazeh kabhi dhundla magar sach phir wahi hoga

sattā bhī vahī zulm vahī vo hī sitam jaur

muflis kī bhī hai maañg vahī aur koī aur

satta bhi wahi zulm wahi wo hi sitam jaur

muflis ki bhi hai mang wahi aur koi aur

kisī ke dil meñ rahnā hai

to phir kuchh dūriyāñ rakhnā

kisi ke dil mein rahna hai

to phir kuchh duriyan rakhna

mausam bhī vahī garm havā.eñ bhī usī taur

hai farq bas itnā ki sitamgar hai koī aur

mausam bhi wahi garm hawaen bhi usi taur

hai farq bas itna ki sitamgar hai koi aur

mausam bhī vahī garm havā.eñ bhī usī taur

hai farq bas itnā ki sitamgar hai koī aur

mausam bhi wahi garm hawaen bhi usi taur

hai farq bas itna ki sitamgar hai koi aur

mazā tabhī hai mohabbat meñ ġharq hone kā

maiñ Duub jā.ūñ to ye ho ki tū bhī to na rahe

maza tabhi hai mohabbat mein gharq hone ka

main Dub jaun to ye ho ki tu bhi to na rahe

barseñgī aaj rahmateñ aamad hai yaar kī

nāyāb haiñ ye ghaḌiyāñ tire intizār ke

barsengi aaj rahmaten aamad hai yar ki

nayab hain ye ghaDiyan tere intizar ke

chāhtī thī ki log kam hī mileñ

so añdheroñ meñ hī qayām kiyā

chahti thi ki log kam hi milen

so andheron mein hi qayam kiya

guzar hī jā.eñge tere firāq ke mausam

har intizār ke aage bhī haiñ maqām ka.ī

guzar hi jaenge tere firaq ke mausam

har intizar ke aage bhi hain maqam kai

merī sāñsoñ ne aaj dastak dī

yaad aayā ki haañ maiñ zinda huuñ

meri sanson ne aaj dastak di

yaad aaya ki han main zinda hun

tirī yādoñ se mahkā hai merī tanhā.ī kā aalam

qayāmat tak inhīñ tanhā.iyāñ meñ Dūbnā chāhūñ

teri yaadon se mahka hai meri tanhai ka aalam

qayamat tak inhin tanhaiyan mein Dubna chahun

badalte mausamoñ se kyā gila un kī to fitrat hai

magar insāñ kā rishtoñ meñ ye aanā aur jaanā kyā

badalte mausamon se kya gila un ki to fitrat hai

magar insan ka rishton mein ye aana aur jaana kya

dard jab zabt kī har had se guzar jaatā hai

ḳhvāb tanhā.ī kī āġhosh meñ so jaate haiñ

dard jab zabt ki har had se guzar jata hai

KHwab tanhai ki aaghosh mein so jate hain

mohabbat umr bhar kī rā.egāñ karnā nahīñ achchhā

sañbhal ai dil anā ko āsmāñ karnā nahīñ achchhā

mohabbat umr bhar ki raegan karna nahin achchha

sanbhal ai dil ana ko aasman karna nahin achchha

sun ke har samt siskiyāñ maiñ ne

jaane kyoñ kar liiñ dūriyāñ maiñ ne

sun ke har samt siskiyan main ne

jaane kyon kar lin duriyan main ne

qadam-qadam pe tire rokne kī koshish ne

qadam-qadam pe mirā hausla baḌhāyā hai

qadam-qadam pe tere rokne ki koshish ne

qadam-qadam pe mera hausla baDhaya hai

sun ke har samt siskiyāñ maiñ ne

jaane kyoñ kar liiñ dūriyāñ maiñ ne

sun ke har samt siskiyan main ne

jaane kyon kar lin duriyan main ne

zabāñ kar ke muqaffal tum sadā.eñ chāhte ho

sazā dete ho pahle phir duā.eñ chāhte ho

zaban kar ke muqaffal tum sadaen chahte ho

saza dete ho pahle phir duaen chahte ho

zindagī ab tujhe sañvāreñ kyā

koshisheñ saarī be-asar shāyad

zindagi ab tujhe sanwaren kya

koshishen sari be-asar shayad

tumheñ ham se mohabbat hai hameñ tum se mohabbat hai

anā kā dā.era phir bhī hamāre darmiyāñ kyoñ hai

tumhein hum se mohabbat hai hamein tum se mohabbat hai

ana ka daera phir bhi hamare darmiyan kyon hai

ham-safar vo jo ham-safar hī na thā

aur phir kar liiñ dūriyāñ maiñ ne

ham-safar wo jo ham-safar hi na tha

aur phir kar lin duriyan main ne

na hoñ ḳhvāhisheñ na gilā koī na jafā koī

na savāl ahd-e-vafā kā ho vahī ishq hai

na hon KHwahishen na gila koi na jafa koi

na sawal ahd-e-wafa ka ho wahi ishq hai

ham ne hazār fāsle jī kar tamām shab

ik muḳhtasar sī raat ko muddat banā diyā

hum ne hazar fasle ji kar tamam shab

ek muKHtasar si raat ko muddat bana diya

ab zamāna hai bevafā.ī kā

siikh leñ ham bhī ye hunar shāyad

ab zamana hai bewafai ka

sikh len hum bhi ye hunar shayad

gañvā dī umr jis ko jītne meñ

vo duniyā merī jaañ terī na merī

ganwa di umr jis ko jitne mein

wo duniya meri jaan teri na meri

mile qatra qatra ye kyā zindagī hai

ai dariyā-e-rahmat vahī tishnagī hai

mile qatra qatra ye kya zindagi hai

ai dariya-e-rahmat wahi tishnagi hai

adhūrī vafāoñ se ummīd rakhnā

hamāre bhī dil kī ajab sādgī hai

adhuri wafaon se ummid rakhna

hamare bhi dil ki ajab sadgi hai

do kināroñ ko milāyā thā faqat lahroñ ne

ham agar us ke na the vo bhī hamārā kab thā

do kinaron ko milaya tha faqat lahron ne

hum agar us ke na the wo bhi hamara kab tha

sub.h-e-raushan ko añdheroñ se bharī shaam na de

dil ke rishte ko mirī jaan koī naam na de

subh-e-raushan ko andheron se bhari sham na de

dil ke rishte ko meri jaan koi nam na de

aaj mausam bhī kuchh udaas milā

aaj tanhā.ī bhī akelī hai

aaj mausam bhi kuchh udas mila

aaj tanhai bhi akeli hai