jo nigāh-e-nāz kā bismil nahīñ

dil nahīñ vo dil nahīñ vo dil nahīñ

jo nigah-e-naz ka bismil nahin

dil nahin wo dil nahin wo dil nahin

terī baḳhshish ke bharose pe ḳhatā.eñ kī haiñ

terī rahmat ke sahāre ne gunahgār kiyā

teri baKHshish ke bharose pe KHataen ki hain

teri rahmat ke sahaare ne gunahgar kiya

rahne de apnī bandagī zāhid

be-mohabbat ḳhudā nahīñ miltā

rahne de apni bandagi zahid

be-mohabbat KHuda nahin milta

mujh ko ma.alūm hai anjām-e-mohabbat kyā hai

ek din maut kī ummīd pe jiinā hogā

mujh ko malum hai anjam-e-mohabbat kya hai

ek din maut ki ummid pe jina hoga

phuul kyā Dāloge turbat par mirī

ḳhaak bhī tum se na Daalī jā.egī

phul kya Daloge turbat par meri

KHak bhi tum se na Dali jaegi

tirī adā kī qasam hai tirī adā ke sivā

pasand aur kisī kī hameñ adā na huī

teri ada ki qasam hai teri ada ke siwa

pasand aur kisi ki hamein ada na hui

din bhī hai raat bhī hai sub.h bhī hai shaam bhī hai

itne vaqtoñ meñ koī vaqt-e-mulāqāt bhī hai

din bhi hai raat bhi hai subh bhi hai sham bhi hai

itne waqton mein koi waqt-e-mulaqat bhi hai

hañsī hai dil-lagī hai qahqahe haiñ

tumhārī anjuman kā pūchhnā kyā

hansi hai dil-lagi hai qahqahe hain

tumhaari anjuman ka puchhna kya

kab vo ā.eñge ilāhī mire mehmāñ ho kar

kaun din kaun baras kaun mahīna hogā

kab wo aaenge ilahi mere mehman ho kar

kaun din kaun baras kaun mahina hoga

aap kā iḳhtiyār hai sab par

aap par iḳhtiyār kis kā hai

aap ka iKHtiyar hai sab par

aap par iKHtiyar kis ka hai

jo dil-nashīñ ho kisī ke to is kā kyā kahnā

jagah nasīb se miltī hai dil ke goshoñ meñ

jo dil-nashin ho kisi ke to is ka kya kahna

jagah nasib se milti hai dil ke goshon mein

mehrbānī chārasāzoñ kī baḌhī

jab baḌhā darmāñ to bīmārī baḌhī

mehrbani chaarasazon ki baDhi

jab baDha darman to bimari baDhi

apnī sī karo tum bhī apnī sī kareñ ham bhī

kuchh tum ne bhī Thānī hai kuchh ham ne bhī Thānī hai

apni si karo tum bhi apni si karen hum bhi

kuchh tum ne bhi Thani hai kuchh hum ne bhi Thani hai

bevafā umr daġhābāz javānī niklī

na yahī rahtī hai zālim na vahī rahtī hai

bewafa umr daghabaz jawani nikli

na yahi rahti hai zalim na wahi rahti hai

qubūl ho ki na ho sajda o salām apnā

tumhāre bande haiñ ham bandagī hai kaam apnā

qubul ho ki na ho sajda o salam apna

tumhaare bande hain hum bandagi hai kaam apna

le chalā phir mujhe dil yār-e-dil-āzār ke paas

ab ke chhoḌ ā.ūñgā zālim ko sitamgār ke paas

le chala phir mujhe dil yar-e-dil-azar ke pas

ab ke chhoD aaunga zalim ko sitamgar ke pas

dāman ashkoñ se tar kareñ kyūñ-kar

raaz ko mushtahar kareñ kyūñ-kar

daman ashkon se tar karen kyun-kar

raaz ko mushtahar karen kyun-kar

milo milo na milo iḳhtiyār hai tum ko

is aarzū ke sivā aur aarzū kyā hai

milo milo na milo iKHtiyar hai tum ko

is aarzu ke siwa aur aarzu kya hai

ik tirī baat ki jis baat kī tardīd muhāl

ik mirā ḳhvāb ki jis ḳhvāb kī ta.abīr nahīñ

ek teri baat ki jis baat ki tardid muhaal

ek mera KHwab ki jis KHwab ki tabir nahin

kab un āñkhoñ kā sāmnā na huā

tiir jin kā kabhī ḳhatā na huā

kab un aankhon ka samna na hua

tir jin ka kabhi KHata na hua

samjhā.eñ kis tarah dil-e-nā-kardā-kār ko

ye dostī samajhtā hai dushman ke pyaar ko

samjhaen kis tarah dil-e-na-karda-kar ko

ye dosti samajhta hai dushman ke pyar ko

kisī ne barchhiyāñ mārīñ kisī ne tiir maare haiñ

ḳhudā rakkhe inheñ ye sab karam-farmā hamāre haiñ

kisi ne barchhiyan marin kisi ne tir mare hain

KHuda rakkhe inhen ye sab karam-farma hamare hain

maiñ to har har ḳham-e-gesū kī talāshī lūñgā

ki mirā dil hai tire gesū-e-ḳhamdār ke paas

main to har har KHam-e-gesu ki talashi lunga

ki mera dil hai tere gesu-e-KHamdar ke pas

jo qayāmat kā nahīñ din vo mirā din kaisā

jo taḌap kar na kaTī ho vo mirī raat nahīñ

jo qayamat ka nahin din wo mera din kaisa

jo taDap kar na kaTi ho wo meri raat nahin

aane meñ kabhī aap se jaldī nahīñ hotī

jaane meñ kabhī aap tavaqquf nahīñ karte

aane mein kabhi aap se jaldi nahin hoti

jaane mein kabhi aap tawaqquf nahin karte

ye ġham-kada hai is meñ 'mubārak' ḳhushī kahāñ

ġham ko ḳhushī banā koī pahlū nikāl ke

ye gham-kada hai is mein 'mubarak' KHushi kahan

gham ko KHushi bana koi pahlu nikal ke

kisī se aaj kā va.ada kisī se kal kā va.ada hai

zamāne ko lagā rakkhā hai is ummīd-vārī meñ

kisi se aaj ka wada kisi se kal ka wada hai

zamane ko laga rakkha hai is ummid-wari mein

mohabbat meñ vafā kī had jafā kī intihā kaisī

'mubārak' phir na kahnā ye sitam koī sahe kab tak

mohabbat mein wafa ki had jafa ki intiha kaisi

'mubarak' phir na kahna ye sitam koi sahe kab tak

kahīñ aisā na ho kam-baḳht meñ jaan aa jaa.e

is liye haath meñ lete mirī tasvīr nahīñ

kahin aisa na ho kam-baKHt mein jaan aa jae

is liye hath mein lete meri taswir nahin

mirī ḳhaak bhī uḌegī bā-adab tirī galī meñ

tire āstāñ se ūñchā na mirā ġhubār hogā

meri KHak bhi uDegi ba-adab teri gali mein

tere aastan se uncha na mera ghubar hoga

us galī meñ hazār ġham TuuTā

aanā jaanā magar nahīñ chhūTā

us gali mein hazar gham TuTa

aana jaana magar nahin chhuTa

ga.ī bahār magar apnī be-ḳhudī hai vahī

samajh rahā huuñ ki ab tak bahār baaqī hai

gai bahaar magar apni be-KHudi hai wahi

samajh raha hun ki ab tak bahaar baqi hai

shikast-e-tauba kī tamhīd hai tirī tauba

zabāñ pe tauba 'mubārak' nigāh sāġhar par

shikast-e-tauba ki tamhid hai teri tauba

zaban pe tauba 'mubarak' nigah saghar par

kisī kī tamannā nikaltī rahī

mirī aarzū haath maltī rahī

kisi ki tamanna nikalti rahi

meri aarzu hath malti rahi

ye tasarruf hai 'mubārak' daaġh kā

kyā se kyā urdu zabāñ hotī ga.ī

ye tasarruf hai 'mubarak' dagh ka

kya se kya urdu zaban hoti gai

ik mirā sar ki qadam-bosī kī hasrat is ko

ik tirī zulf ki qadmoñ se lagī rahtī hai

ek mera sar ki qadam-bosi ki hasrat is ko

ek teri zulf ki qadmon se lagi rahti hai

ḳhair saaqī kī salāmat mai-kada

jis qadar pī utnī hushyārī baḌhī

KHair saqi ki salamat mai-kada

jis qadar pi utni hushyari baDhi

dil lagāte hī to kah detī haiñ āñkheñ sab kuchh

aise kāmoñ ke bhī āġhāz kahīñ chhupte haiñ

dil lagate hi to kah deti hain aankhen sab kuchh

aise kaamon ke bhi aaghaz kahin chhupte hain

dil meñ aane ke 'mubārak' haiñ hazāroñ raste

ham batā.eñ use rāheñ koī ham se pūchhe

dil mein aane ke 'mubarak' hain hazaron raste

hum bataen use rahen koi hum se puchhe

tum bhuul ga.e mujh ko yuuñ yaad dilātā huuñ

jo aah nikaltī hai vo yād-dahānī hai

tum bhul gae mujh ko yun yaad dilata hun

jo aah nikalti hai wo yaad-dahani hai

kal to dekhā thā 'mubārak' but-kade meñ aap ko

aaj hazrat jā ke masjid meñ musalmāñ ho ga.e

kal to dekha tha 'mubarak' but-kade mein aap ko

aaj hazrat ja ke masjid mein musalman ho gae

kuchh is andāz se sayyād ne āzād kiyā

jo chale chhuT ke qafas se vo giraftār chale

kuchh is andaz se sayyaad ne aazad kiya

jo chale chhuT ke qafas se wo giraftar chale

kyā kaheñ kyā kyā kiyā terī nigāhoñ ne sulūk

dil meñ aa.iiñ dil meñ Thahrīñ dil meñ paikāñ ho ga.iiñ

kya kahen kya kya kiya teri nigahon ne suluk

dil mein aain dil mein Thahrin dil mein paikan ho gain

asar ho yā na ho vaa.iz bayāñ meñ

magar chaltī to hai terī zabāñ ḳhuub

asar ho ya na ho waiz bayan mein

magar chalti to hai teri zaban KHub

kahāñ qismat meñ is kī phuul honā

vahī dil kī kalī hai aur ham haiñ

kahan qismat mein is ki phul hona

wahi dil ki kali hai aur hum hain

tum ko samjhā.e 'mubārak' koī kyūñkar afsos

tum to rone lage yaar aur bhī samjhāne se

tum ko samjhae 'mubarak' koi kyunkar afsos

tum to rone lage yar aur bhi samjhane se

jo un ko chāhiye vo kiye jā rahe haiñ vo

jo mujh ko chāhiye vo kiye jā rahā huuñ maiñ

jo un ko chahiye wo kiye ja rahe hain wo

jo mujh ko chahiye wo kiye ja raha hun main

is bharī mahfil meñ ham se dāvar-e-mahshar na pūchh

ham kaheñge tujh se apnī dāstāñ sab se alag

is bhari mahfil mein hum se dawar-e-mahshar na puchh

hum kahenge tujh se apni dastan sab se alag

merī dushvārī hai dushvārī mirī

merī mushkil aap kī mushkil nahīñ

meri dushwari hai dushwari meri

meri mushkil aap ki mushkil nahin

na mānoge na mānoge hamārī

udhar ho jā.egī duniyā idhar kī

na manoge na manoge hamari

udhar ho jaegi duniya idhar ki