درد بڑھ کر دوا نہ ہو جائے

زندگی بے مزا نہ ہو جائے

میری بیتابیوں سے گھبرا کر

کوئی مجھ سے خفا نہ ہو جائے

درد کا پھر مزہ ہے جب اخترؔ

درد خود چارہ ساز ہو جائے

یہ اور بات کہ اقرار کر سکیں نہ کبھی

مری وفا کا مگر ان کو اعتبار تو ہے

ہمیں دنیا میں اپنے غم سے مطلب

زمانے کی خوشی سے واسطا کیا

وہ تعلق ہے ترے غم سے کہ اللہ اللہ

ہم کو حاصل ہو خوشی بھی تو گوارا نہ کریں

مجھے تو کل بھی نہ تھا ان پر اختیار کوئی

اور ان کو مجھ پہ وہی اختیار آج بھی ہے

مجھے آنکھیں دکھائے گی بھلا کیا گردش دوراں

مری نظروں نے دیکھا ہے ترا نامہرباں ہونا

میرے سکون قلب کو لے کر چلے گئے

اور اضطراب درد جگر دے گئے مجھے

مآل ضبط پیہم ہو گئی ہے

مسرت حاصل غم ہو گئی ہے