نظر کہیں ہے مخاطب کسی سے ہیں دل میں

جواب کس کو ملا ہے سوال کس کا تھا

ہو لیے جس کے ہو لیے بیخودؔ

یار اپنا تو یہ حساب رہا

انہیں تو ستم کا مزا پڑ گیا ہے

کہاں کا تجاہل کہاں کا تغافل

ملا کے خاک میں سرمایۂ دل بیخودؔ

وہ پوچھتے ہیں بتاؤ یہ مال کس کا تھا

آئنہ دیکھ کے خورشید پہ کرتے ہیں نظر

پھر چھپا لیتے ہیں وہ چہرۂ انور اپنا

قیامت ہے تری اٹھتی جوانی

غضب ڈھانے لگیں نیچی نگاہیں

رقیبوں کے لیے اچھا ٹھکانا ہو گیا پیدا

خدا آباد رکھے میں تو کہتا ہوں جہنم کو

کیا کہہ دیا یہ آپ نے چپکے سے کان میں

دل کا سنبھالنا مجھے دشوار ہو گیا

حوروں سے نہ ہوگی یہ مدارات کسی کی

یاد آئے گی جنت میں ملاقات کسی کی

نو گرفتار محبت ہوں وفا مجھ میں کہاں

کم سے کم دل ابھی سو بار تو آنے دیجے

کوئی اس طرح سے ملنے کا مزا ملتا ہے

اوپری دل سے وہ ملتا ہے تو کیا ملتا ہے

زمانہ ہم نے ظالم چھان مارا

نہیں ملتیں ترے ملنے کی راہیں

تمہارے ہاتھ خالی جیب خالی زلف خالی تھی

نہ تھے تم چور دل کے لو ادھر دیکھو یہ کیا نکلا

اس جبین عرق افشاں پہ نہ چنئے افشاں

یہ ستارے کہیں مل جائیں نہ سیاروں میں

ہمیں اسلام اسے اتنا تعلق ہے ابھی باقی

بتوں سے جب بگڑتی ہے خدا کو یاد کرتے ہیں

یہ کہہ کے میرے سامنے ٹالا رقیب کو

مجھ سے کبھی کی جان نہ پہچان جائیے

چشم بد دور وہ بھولے بھی ہیں ناداں بھی ہیں

ظلم بھی مجھ پہ کبھی سوچ سمجھ کر نہ ہوا

آئنہ دیکھ کر وہ یہ سمجھے

مل گیا حسن بے مثال ہمیں

سخت جاں ہوں مجھے اک وار سے کیا ہوتا ہے

ایسی چوٹیں کوئی دو چار تو آنے دیجے

نہ دیکھے ہوں گے رند لاابالی تم نے بیخودؔ سے

کہ ایسے لوگ اب آنکھوں سے اوجھل ہوتے جاتے ہیں

بیخودؔ ضرور رات کو سوئے ہو پی کے تم

یہ تو کہو نماز پڑھی یا قضا ہوئی

غم میں ڈوبے ہی رہے دم نہ ہمارا نکلا

بحر ہستی کا بہت دور کنارا نکلا

پڑھے جاؤ بیخودؔ غزل پر غزل

وہ بت بن گئے ہیں سنے جائیں گے

اپنے جلوے کا وہ خود آپ تماشائی ہے

آئینے اس نے لگا رکھے ہیں دیواروں میں

تری تیغ کا لال کر دوں گا منہ

جو یہ کھیلنے مجھ سے آئے گی رنگ

وہ کچھ مسکرانا وہ کچھ جھینپ جانا

جوانی ادائیں سکھاتی ہیں کیا کیا

جواب سوچ کے وہ دل میں مسکراتے ہیں

ابھی زبان پہ میری سوال بھی تو نہ تھا

دل محبت سے بھر گیا بیخودؔ

اب کسی پر فدا نہیں ہوتا

راہ میں بیٹھا ہوں میں تم سنگ رہ سمجھو مجھے

آدمی بن جاؤں گا کچھ ٹھوکریں کھانے کے بعد

آپ کو رنج ہوا آپ کے دشمن روئے

میں پشیمان ہوا حال سنا کر اپنا

دی قسم وصل میں اس بت کو خدا کی تو کہا

تجھ کو آتا ہے خدا یاد ہمارے ہوتے

محفل وہی مکان وہی آدمی وہی

یا ہم نئے ہیں یا تری عادت بدل گئی

موت آ رہی ہے وعدے پہ یا آ رہے ہو تم

کم ہو رہا ہے درد دل بے قرار کا

چلنے کی نہیں آج کوئی گھات کسی کی

سننے کے نہیں وصل میں ہم بات کسی کی

دل تو لیتے ہو مگر یہ بھی رہے یاد تمہیں

جو ہمارا نہ ہوا کب وہ تمہارا ہوگا

کچھ طرح رندوں نے دی کچھ محتسب بھی دب گیا

چھیڑ آپس میں سر بازار ہو کر رہ گئی

سن کے ساری داستان رنج و غم

کہہ دیا اس نے کہ پھر ہم کیا کریں

جھوٹا جو کہا میں نے تو شرما کے وہ بولے

اللہ بگاڑے نہ بنی بات کسی کی

بات وہ کہئے کہ جس بات کے سو پہلو ہوں

کوئی پہلو تو رہے بات بدلنے کے لیے

دل وہ کافر ہے کہ مجھ کو نہ دیا چین کبھی

بے وفا تو بھی اسے لے کے پشیماں ہوگا

تکیہ ہٹتا نہیں پہلو سے یہ کیا ہے بیخودؔ

کوئی بوتل تو نہیں تم نے چھپا رکھی ہے

دل وہ کافر ہے کہ مجھ کو نہ دیا چین کبھی

بے وفا تو بھی اسے لے کے پشیماں ہوگا

ہمیں پینے سے مطلب ہے جگہ کی قید کیا بیخودؔ

اسی کا نام جنت رکھ دیا بوتل جہاں رکھ دی

تم کو آشفتہ مزاجوں کی خبر سے کیا کام

تم سنوارا کرو بیٹھے ہوئے گیسو اپنے

نامہ بر یہ تو کہی بات پتے کی تو نے

ذکر اس بزم میں رہتا تو ہے اکثر اپنا

دل چرا کر لے گیا تھا کوئی شخص

پوچھنے سے فائدہ، تھا کوئی شخص

محبت اور مجنوں ہم تو سودا اس کو کہتے ہیں

فدا لیلیٰ پہ تھا آنکھوں کا اندھا اس کو کہتے ہیں

میرا ہر شعر ہے اک راز حقیقت بیخودؔ

میں ہوں اردو کا نظیریؔ مجھے تو کیا سمجھا

زاہدوں سے نہ بنی حشر کے دن بھی یارب

وہ کھڑے ہیں تری رحمت کے طلب گار جدا

اب آپ کوئی کام سکھا دیجئے ہم کو

معلوم ہوا عشق کے قابل تو نہیں ہم