aankhon ke samne koi manzar naya na tha

āñkhoñ ke sāmne koī manzar nayā na thā

bas vo zarā sā fāsla baaqī rahā na thā

ab is safar kā silsila shāyad hī ḳhatm ho

sab apnī apnī raah leñ ham ne kahā na thā

darvāze aaj band samajhiye sulūk ke

ye chalne vaalā duur talak silsila na thā

ūñchī uḌaan ke liye par taulte the ham

ūñchā.iyoñ pe saañs ghuTegī patā na thā

koshish hazār kartī raheñ tez āñdhiyāñ

lekin vo ek patta abhī tak hilā na thā

sab hī shikār-gāh meñ the ḳhema-zan magar

koī shikār karne ko ab tak uThā na thā

achchhā huā ki gosha-nashīnī kī iḳhtiyār

'āshufta' aur is ke sivā rāsta na thā

aankhon ke samne koi manzar naya na tha

bas wo zara sa fasla baqi raha na tha

ab is safar ka silsila shayad hi KHatm ho

sab apni apni rah len hum ne kaha na tha

darwaze aaj band samajhiye suluk ke

ye chalne wala dur talak silsila na tha

unchi uDan ke liye par taulte the hum

unchaiyon pe sans ghuTegi pata na tha

koshish hazar karti rahen tez aandhiyan

lekin wo ek patta abhi tak hila na tha

sab hi shikar-gah mein the KHema-zan magar

koi shikar karne ko ab tak uTha na tha

achchha hua ki gosha-nashini ki iKHtiyar

'ashufta' aur is ke siwa rasta na tha