aaya hi nahin koi bojh apna uThane ko

aayā hī nahīñ koī bojh apnā uThāne ko

kab tak maiñ chhupā rakhtā is ḳhvāb-ḳhazāne ko

dekhā nahīñ ruḳh karte jis tarf zamāne ko

jī chāhtā hai aksar us samt hī jaane ko

ye shaġhl-e-zabānī bhī be-sarfa nahīñ āḳhir

sau baat banātā huuñ ik baat banāne ko

is kunj-e-tabī.at kī mumkin hai havā badle

jhoñkā koī aa jaa.e patte hī uḌāne ko

raazī na huā maiñ bhī mānūs manāzir par

tayyār na thā vo bhī kuchh aur dikhāne ko

jaisā ki samajhte ho vaisā to nahīñ kuchh bhī

ye saarā tamāshā hai ik vahm miTāne ko

aaya hi nahin koi bojh apna uThane ko

kab tak main chhupa rakhta is KHwab-KHazane ko

dekha nahin ruKH karte jis tarf zamane ko

ji chahta hai aksar us samt hi jaane ko

ye shaghl-e-zabani bhi be-sarfa nahin aaKHir

sau baat banata hun ek baat banane ko

is kunj-e-tabiat ki mumkin hai hawa badle

jhonka koi aa jae patte hi uDane ko

raazi na hua main bhi manus manazir par

tayyar na tha wo bhi kuchh aur dikhane ko

jaisa ki samajhte ho waisa to nahin kuchh bhi

ye sara tamasha hai ek wahm miTane ko