abhi guzre dinon ki kuchh sadaen shor karti hain

abhī guzre dinoñ kī kuchh sadā.eñ shor kartī haiñ

darīche band rahne do, havā.eñ shor kartī haiñ

yahī to fikr ke jalte paroñ pe tāziyāna hai

ki har tārīk kamre meñ duā.eñ shor kartī haiñ

kahā nā thā hisār-e-ism-e-āzam khīñchne vaale

yahāñ aaseb rahte haiñ balā.eñ shor kartī haiñ

hameñ bhī tajraba hai be-gharī kā chhat na hone kā

darinde, bijliyāñ, kaalī ghaTā.eñ shor kartī haiñ

abhī gard-e-safar ke girye kī hai guuñj kānoñ meñ

abhī kyuuñ muntazir ḳhālī sarā.eñ shor kartī haiñ

hameñ sairāb rakkhā hai ḳhudā kā shukr hai us ne

jahāñ banjar zamīneñ hoñ anā.eñ shor kartī haiñ

abhi guzre dinon ki kuchh sadaen shor karti hain

dariche band rahne do, hawaen shor karti hain

yahi to fikr ke jalte paron pe taziyana hai

ki har tarik kamre mein duaen shor karti hain

kaha na tha hisar-e-ism-e-azam khinchne wale

yahan aaseb rahte hain balaen shor karti hain

hamein bhi tajraba hai be-ghari ka chhat na hone ka

darinde, bijliyan, kali ghaTaen shor karti hain

abhi gard-e-safar ke girye ki hai gunj kanon mein

abhi kyun muntazir KHali saraen shor karti hain

hamein sairab rakkha hai KHuda ka shukr hai us ne

jahan banjar zaminen hon anaen shor karti hain