agar rona hi ab mera muqaddar hai mohabbat mein

agar ronā hī ab merā muqaddar hai mohabbat meñ

to dāman bhī tumhārā ho mire ashkoñ kī qismat meñ

savālī ho ke maiñ ne tere dar ko baḳhsh dī izzat

nahīñ to kyā nahīñ hai mere dāmān-e-mohabbat meñ

pa.e-baḳhshish abhī dariyā-e-rahmat josh meñ aa.e

kam-az-kam ye asar to hai mire ashk-e-nadāmat meñ

pahuñch kar un ke sañg-e-āstāñ par bhī nahīñ miTtī

vo mahrūmi-e-sajda jo likhī hotī hai qismat meñ

atā ko dekh apnī zarf-e-dil kā zikr kyā saaqī

ki dariyā bhī samā hai zarf-e-dil kī vus.at meñ

vo aalam yaad hai jab dil khiñchā jaatā thā pahlū se

kashish pahlī sī kyā baaqī nahīñ lafz-e-mohabbat meñ

vaqār' ai kaash merī umr meñ shāmil na kī jaa.e

vo muddat haañ vahī muddat jo guzrī un kī furqat meñ

agar rona hi ab mera muqaddar hai mohabbat mein

to daman bhi tumhaara ho mere ashkon ki qismat mein

sawali ho ke main ne tere dar ko baKHsh di izzat

nahin to kya nahin hai mere daman-e-mohabbat mein

pae-baKHshish abhi dariya-e-rahmat josh mein aae

kam-az-kam ye asar to hai mere ashk-e-nadamat mein

pahunch kar un ke sang-e-astan par bhi nahin miTti

wo mahrumi-e-sajda jo likhi hoti hai qismat mein

ata ko dekh apni zarf-e-dil ka zikr kya saqi

ki dariya bhi sama hai zarf-e-dil ki wusat mein

wo aalam yaad hai jab dil khincha jata tha pahlu se

kashish pahli si kya baqi nahin lafz-e-mohabbat mein

waqar' ai kash meri umr mein shamil na ki jae

wo muddat han wahi muddat jo guzri un ki furqat mein