bagh kya kya shajar dikhate hain

baaġh kyā kyā shajar dikhāte haiñ

ham bhī apne samar dikhāte haiñ

aa tujhe be-ḳhabar dikhāte haiñ

hālat-e-nāma-bar dikhāte haiñ

kuchh mazāhir haiñ jo nagar meñ hameñ

dūsrā hī nagar dikhāte haiñ

rūh-e-mutlaq meñ ishq jazb huā

arsh kā kaam kar dikhāte haiñ

ḳhud to pahuñche hue haiñ manzil par

paañv ko dar-ba-dar dikhāte haiñ

ham ko matlūb ḳhud se jaanā hai

vaañ nahīñ haiñ jidhar dikhāte haiñ

kitnā phailāv raqs-e-āb meñ hai

apne sar se utar dikhāte haiñ

aa dikhāte haiñ tujh ko apnā aap

aur dil khol kar dikhāte haiñ

aa karāte haiñ sair-e-dil tujh ko

aa tujhe bahr-o-bar dikhāte haiñ

jab dikhānī ho raunaq-e-raftār

vo yahāñ se guzar dikhāte haiñ

uThte paanī sī lahr lene se vo

sar se pā tak kamar dikhāte haiñ

kaun sūraj hamārī āñkhoñ ko

ḳhvāb-e-shām-o-sahar dikhāte haiñ

rāh-e-dushvār jab nahīñ kaTtī

vo koī baat kar dikhāte haiñ

mat uThā ab koī na.ī dīvār

ham tujhe apnā sar dikhāte haiñ

chāñdnī kyā kahīñ pe bikhregī

tere dar par bikhar dikhāte haiñ

dekh ik tañgī-e-qayāmat-ḳhez

ham tujhe apnā ghar dikhāte haiñ

bām-e-aflāk se utaar hameñ

haath par diip dhar dikhāte haiñ

asl ruḳh kā nahīñ hai ushr-e-ashīr

jo hameñ chāra-gar dikhāte haiñ

kuchh to mazmūñ bane-banā.e haiñ

aur kuchh bāñdh kar dikhāte haiñ

ġhamza-hā-e-pas-e-nazzāra 'naved'

ham ko rāh-e-safar dikhāte haiñ

bagh kya kya shajar dikhate hain

hum bhi apne samar dikhate hain

aa tujhe be-KHabar dikhate hain

haalat-e-nama-bar dikhate hain

kuchh mazahir hain jo nagar mein hamein

dusra hi nagar dikhate hain

ruh-e-mutlaq mein ishq jazb hua

arsh ka kaam kar dikhate hain

KHud to pahunche hue hain manzil par

panw ko dar-ba-dar dikhate hain

hum ko matlub KHud se jaana hai

wan nahin hain jidhar dikhate hain

kitna phailaw raqs-e-ab mein hai

apne sar se utar dikhate hain

aa dikhate hain tujh ko apna aap

aur dil khol kar dikhate hain

aa karaate hain sair-e-dil tujh ko

aa tujhe bahr-o-bar dikhate hain

jab dikhani ho raunaq-e-raftar

wo yahan se guzar dikhate hain

uThte pani si lahr lene se wo

sar se pa tak kamar dikhate hain

kaun suraj hamari aankhon ko

KHwab-e-sham-o-sahar dikhate hain

rah-e-dushwar jab nahin kaTti

wo koi baat kar dikhate hain

mat uTha ab koi nai diwar

hum tujhe apna sar dikhate hain

chandni kya kahin pe bikhregi

tere dar par bikhar dikhate hain

dekh ek tangi-e-qayamat-KHez

hum tujhe apna ghar dikhate hain

baam-e-aflak se utar hamein

hath par dip dhar dikhate hain

asl ruKH ka nahin hai ushr-e-ashir

jo hamein chaara-gar dikhate hain

kuchh to mazmun bane-banae hain

aur kuchh bandh kar dikhate hain

ghamza-ha-e-pas-e-nazzara 'nawed'

hum ko rah-e-safar dikhate hain