bite KHwab ki aadi aankhen kaun unhen samjhae

biite ḳhvāb kī aadī āñkheñ kaun unheñ samjhā.e

har aahaT par dil yuuñ dhaḌke jaise tum ho aa.e

zid meñ aa kar chhoḌ rahī hai un bāñhoñ ke saa.e

jal jā.egī mom kī guḌiyā duniyā dhūp-sarā.e

shaam huī to ghar kī har ik shai par aa kar jhapTe

āñgan kī dahlīz pe baiThe vīrānī ke saa.e

har ik dhaḌkan dard kī gahrī Tiis meñ Dhal jaatī hai

raat ga.e jab yaad kā panchhī apne par phailā.e

andar aisā habs thā maiñ ne khol diyā darvāza

jis ne dil se jaanā hai vo ḳhāmoshī se jaa.e

kis kis phuul kī shādābī ko masḳh karoge bolo!!!

ye to us kī den hai jis ko chāhe vo mahkā.e

bite KHwab ki aadi aankhen kaun unhen samjhae

har aahaT par dil yun dhaDke jaise tum ho aae

zid mein aa kar chhoD rahi hai un banhon ke sae

jal jaegi mom ki guDiya duniya dhup-sarae

sham hui to ghar ki har ek shai par aa kar jhapTe

aangan ki dahliz pe baiThe virani ke sae

har ek dhaDkan dard ki gahri Tis mein Dhal jati hai

raat gae jab yaad ka panchhi apne par phailae

andar aisa habs tha main ne khol diya darwaza

jis ne dil se jaana hai wo KHamoshi se jae

kis kis phul ki shadabi ko masKH karoge bolo!!!

ye to us ki den hai jis ko chahe wo mahkae