bisat-e-waqt pe sadiyon ke fasle hum log

bisāt-e-vaqt pe sadiyoñ ke fāsle ham log

kanār-e-shām-o-sahar meñ kahāñ Dhale ham log

na kārvāñ na musāfir magar jaras na thamī

na raushnī na harārat magar jale ham log

maqām jin kā muarriḳh ke hāfize meñ nahīñ

shikast o fat.h ke mābain marhale ham log

numūd-e-jism kī shorīda ḳhvāhisheñ duniyā

fishār-e-rūh ke nādīda valvale ham log

na jaane kab koī karvaT hameñ jagā Daale

zamīñ ke batn meñ ḳhvābīda zalzale ham log

fasād-e-koh-kanī hīla-hā-e-parvezī

hazār rañg ke kāñToñ meñ aable ham log

amīr-e-shahr kī moTī samajh meñ kyā aate

zamīr-e-dahr ke nāzuk muāmle ham log

hujūm-e-sañg-e-aziyyat meñ sar jhukā.e hue

ravāñ haiñ le ke mashiyyat ke qāfile ham log

zabāñ-burīda o be-dast-o-pā sahī lekin

zamīr-e-kaun-o-makāñ haiñ bure bhale ham log

bisat-e-waqt pe sadiyon ke fasle hum log

kanar-e-sham-o-sahar mein kahan Dhale hum log

na karwan na musafir magar jaras na thami

na raushni na hararat magar jale hum log

maqam jin ka muarriKH ke hafize mein nahin

shikast o fath ke mabain marhale hum log

numud-e-jism ki shorida KHwahishen duniya

fishaar-e-ruh ke nadida walwale hum log

na jaane kab koi karwaT hamein jaga Dale

zamin ke batn mein KHwabida zalzale hum log

fasad-e-koh-kani hila-ha-e-parwezi

hazar rang ke kanTon mein aable hum log

amir-e-shahr ki moTi samajh mein kya aate

zamir-e-dahr ke nazuk muamle hum log

hujum-e-sang-e-aziyyat mein sar jhukae hue

rawan hain le ke mashiyyat ke qafile hum log

zaban-burida o be-dast-o-pa sahi lekin

zamir-e-kaun-o-makan hain bure bhale hum log