chashm-e-KHun-KHwar abru-e-KHamdar donon ek hain

chashm-e-ḳhūñ-ḳhvār abrū-e-ḳhamdār donoñ ek haiñ

haiñ judā lekin ba-vaqt-e-kār donoñ ek haiñ

bā.is-e-ārām ye ne mojib-e-āzār vo

chashm-e-vahdat meñ hī gul aur ḳhaar donoñ ek haiñ

iltiyām-e-zaḳhm-e-dil ke haq meñ gar kiije nigāh

sabza-e-ḳhat marham-e-zañgār donoñ ek haiñ

hālat istiġhnā kī jis ke haath aa.ī hai yahāñ

us ke nazdīk andak o bisyār donoñ ek haiñ

mere us ke go judā.ī aa ga.ī hai darmiyāñ

jis ghaḌī bāham hue do-chār donoñ ek haiñ

jo na maane us ko āshiq ho ke us pe dekh le

abrū-e-ḳhamdār aur talvār donoñ ek haiñ

kyā kahūñ maiñ is ko āñkhoñ ne diye haiñ jo fareb

fann-e-makkārī meñ ye makkār donoñ ek haiñ

jo hai ka.aba vo hī but-ḳhāna hai shaiḳh o barhaman

is kī nāhaq karte ho takrār donoñ ek haiñ

ye nahīñ kahne kā 'joshish' hogā jo sāhib-e-dimāġh

zulf-e-yār o nāfa-e-tātār donoñ ek haiñ

chashm-e-KHun-KHwar abru-e-KHamdar donon ek hain

hain juda lekin ba-waqt-e-kar donon ek hain

bais-e-aram ye ne mojib-e-azar wo

chashm-e-wahdat mein hi gul aur KHar donon ek hain

iltiyam-e-zaKHm-e-dil ke haq mein gar kije nigah

sabza-e-KHat marham-e-zangar donon ek hain

haalat istighna ki jis ke hath aai hai yahan

us ke nazdik andak o bisyar donon ek hain

mere us ke go judai aa gai hai darmiyan

jis ghaDi baham hue do-chaar donon ek hain

jo na mane us ko aashiq ho ke us pe dekh le

abru-e-KHamdar aur talwar donon ek hain

kya kahun main is ko aankhon ne diye hain jo fareb

fann-e-makkari mein ye makkar donon ek hain

jo hai kaba wo hi but-KHana hai shaiKH o barhaman

is ki nahaq karte ho takrar donon ek hain

ye nahin kahne ka 'joshish' hoga jo sahib-e-dimagh

zulf-e-yar o nafa-e-tatar donon ek hain