dard dil mein magar lab pe muskan hai

dard dil meñ magar lab pe muskān hai

hausloñ kī hamāre ye pahchān hai

laakh koshish karo aa ke jaatī nahīñ

yaad ik bin bulā.ī sī mehmān hai

khilkhilātā hai jo aaj ke daur meñ

ik ajūbe se kyā kam vo insān hai

zar zamīñ saltanat se hī hotā nahīñ

jo de bhūke ko roTī, vo sultān hai

miir, tulsī, zafar, josh, mīrā, kabīr

dil hī 'ġhālib' hai aur dil hī 'rasḳhān' hai

pāñch kartā hai jo, do meñ do joḌ kar

āj-kal sirf us kā hī gun-gān hai

DhūñDtā phir rahā phuul par titliyāñ

shahr meñ vo nayā hai ki nādān hai

gar na samjhā to 'nīraj' lagegī kaThin

zindagī ko jo samjhā to āsān hai

dard dil mein magar lab pe muskan hai

hauslon ki hamare ye pahchan hai

lakh koshish karo aa ke jati nahin

yaad ek bin bulai si mehman hai

khilkhilata hai jo aaj ke daur mein

ek ajube se kya kam wo insan hai

zar zamin saltanat se hi hota nahin

jo de bhuke ko roTi, wo sultan hai

mir, tulsi, zafar, josh, mira, kabir

dil hi 'ghaalib' hai aur dil hi 'rasKHan' hai

panch karta hai jo, do mein do joD kar

aaj-kal sirf us ka hi gun-gan hai

DhunDta phir raha phul par titliyan

shahr mein wo naya hai ki nadan hai

gar na samjha to 'niraj' lagegi kaThin

zindagi ko jo samjha to aasan hai