dekh tu yar-e-baada-kash! maine bhi kaam kya kiya

dekh tū yār-e-bāda-kash! maiñ ne bhī kaam kyā kiyā

de ke kabāb-e-dil tujhe haqq-e-namak adā kiyā

kyuuñ sag-e-yār se ḳhajil mujh ko pas-az-fanā kyā

khā gayā ustuḳhāñ mire tū ne ye kyā humā kiyā

zaḳhm-e-jigar se dam-ba-dam kab nahīñ ḳhūñ-bahā kiyā

to bhī na qātil apne se da.avā-e-ḳhūñ-bahā kiyā

us but-e-rashk-e-gul ne jab band-e-qabā ko vā kiyā

apnī nazar ye ġhuncha do haath se phir malā kiyā

kaun se din na yaar ne chashm ko surma-sā kiyā

kab na dil-e-siyāh-baḳht ḳhaak meñ tū milā kiyā

dilbar-e-sho.ala-ḳhū ne jab zulf ko ruḳh pe vā kiyā

dil pe maiñ sūra-e-duḳhāñ karne ko dam paḌhā kiyā

bāda-kashī ko sāqiyā kis kī mujhe batā hubāb

zor-e-bhañvar ke chaak par sāġhar-e-mai banā kiyā

vasl kī raat ham-nashīñ kyūñki kaTī na pūchh kuchh

barsar-e-sulh meñ rahā tis pe bhī vo laḌā kiyā

pā.e-nigār se lipaT chor banī to aap ko hī

haath na kyuuñ tire bañdhīñ kaam ye kyā hinā kiyā

dil kī judā.ī kā kahūñ kis se maiñ mājrā-e-ġham

sail-e-sarishk-e-chashm-e-tar shām-o-sahar bahā kiyā

shakl-e-asā-e-mūsavī thā to vo gesū-e-darāz

par use dast-e-shāna ne de ke ḳham aur dutā kiyā

zeb-e-sar-e-shahāñ kabhī tū ne na dekhā tīra-baḳht

bāl-e-magas ne kab dilā kār-e-par-e-humā kiyā

tār-e-nafas ulajh gayā mere gulū meñ aa ke jab

nāḳhun-e-teġh-e-yār ko maiñ ne girah-kushā kiyā

bosa-e-lab se ek din us ke huā na kāmyāb

dilbar-e-bad-zabāñ kī maiñ gāliyāñ hī sunā kiyā

aa ke salāsil ai junūñ kyuuñ na qadam le ba.ad-e-qais

is kā bhī ham ne silsila az-sar-e-nau bapā kiyā

muñh to na thā ye ġhair kā us ko khilā.e barg-e-pāñ

par na mirā jo bas chalā ḳhūn-e-jigar piyā kiyā

us kī shikastagī kā ġham kyuuñ na ho mujh ko sāqiyā

merī baġhal meñ aah yaañ shīsha-e-dil rahā kiyā

tār-e-nafas judā kiyā barbat-e-tan se mere aah

kaudak-e-mutrib aur kyā tujh ko kahūñ bajā kiyā

koh ko khīñchtā jo tū kāh-rubā to jānte

ik par-e-kāh ko uThā naaz kiyā to kyā kiyā

kyuuñ ho ḳhizr-e-rah-ravāñ ḳhāk-nashīnī pe mirī

jis ne ba-shakl-e-naqsh-e-pā mujh ko hai rahnumā kiyā

shola-ruḳhoñ ke ishq ne kunj-e-mazār meñ bhī aah

sone diyā na chain se maiñ to sadā jalā kiyā

mujh ko hai hijr-o-vasl ek is kī ḳhushī na us kā ġham

kaisī musībatoñ ke din bār-e-ḳhudā bharā kiyā

vasl huā to ye huā mār-e-siyāh jaan kar

raat bhar apnī zulf ke saa.e se vo Darā kiyā

aur maiñ mudda.ā-talab aish se nā-umīd ho

shola-e-sham.a kī tarah sar ko paḌā dhunā kiyā

mudrika-e-bashar hai kyā paa.e jo us kī kunah ko

chāhā jo us ne so kiyā kaun kahe ki kyā kiyā

ya.anī banā ke chashm ko sūrat-e-shīsha-e-hubāb

sāhib-e-zarf thā jo dil jām-e-jahāñ-numā kiyā

apnī sharāratoñ se vo baaz na aayā ai 'nasīr'

mujh ko rulā ke abr saañ barq-e-namat hañsā kiyā

dekh tu yar-e-baada-kash! main ne bhi kaam kya kiya

de ke kabab-e-dil tujhe haqq-e-namak ada kiya

kyun sag-e-yar se KHajil mujh ko pas-az-fana kya

kha gaya ustuKHan mere tu ne ye kya huma kiya

zaKHm-e-jigar se dam-ba-dam kab nahin KHun-baha kiya

to bhi na qatil apne se dawa-e-KHun-baha kiya

us but-e-rashk-e-gul ne jab band-e-qaba ko wa kiya

apni nazar ye ghuncha do hath se phir mala kiya

kaun se din na yar ne chashm ko surma-sa kiya

kab na dil-e-siyah-baKHt KHak mein tu mila kiya

dilbar-e-shoala-KHu ne jab zulf ko ruKH pe wa kiya

dil pe main sura-e-duKHan karne ko dam paDha kiya

baada-kashi ko saqiya kis ki mujhe bata hubab

zor-e-bhanwar ke chaak par saghar-e-mai bana kiya

wasl ki raat ham-nashin kyunki kaTi na puchh kuchh

barsar-e-sulh mein raha tis pe bhi wo laDa kiya

pae-nigar se lipaT chor bani to aap ko hi

hath na kyun tere bandhin kaam ye kya hina kiya

dil ki judai ka kahun kis se main majra-e-gham

sail-e-sarishk-e-chashm-e-tar sham-o-sahar baha kiya

shakl-e-asa-e-musawi tha to wo gesu-e-daraaz

par use dast-e-shana ne de ke KHam aur duta kiya

zeb-e-sar-e-shahan kabhi tu ne na dekha tira-baKHt

baal-e-magas ne kab dila kar-e-par-e-huma kiya

tar-e-nafas ulajh gaya mere gulu mein aa ke jab

naKHun-e-tegh-e-yar ko main ne girah-kusha kiya

bosa-e-lab se ek din us ke hua na kaamyab

dilbar-e-bad-zaban ki main galiyan hi suna kiya

aa ke salasil ai junun kyun na qadam le baad-e-qais

is ka bhi hum ne silsila az-sar-e-nau bapa kiya

munh to na tha ye ghair ka us ko khilae barg-e-pan

par na mera jo bas chala KHun-e-jigar piya kiya

us ki shikastagi ka gham kyun na ho mujh ko saqiya

meri baghal mein aah yan shisha-e-dil raha kiya

tar-e-nafas juda kiya barbat-e-tan se mere aah

kaudak-e-mutrib aur kya tujh ko kahun baja kiya

koh ko khinchta jo tu kah-ruba to jaante

ek par-e-kah ko uTha naz kiya to kya kiya

kyun ho KHizr-e-rah-rawan KHak-nashini pe meri

jis ne ba-shakl-e-naqsh-e-pa mujh ko hai rahnuma kiya

shola-ruKHon ke ishq ne kunj-e-mazar mein bhi aah

sone diya na chain se main to sada jala kiya

mujh ko hai hijr-o-wasl ek is ki KHushi na us ka gham

kaisi musibaton ke din bar-e-KHuda bhara kiya

wasl hua to ye hua mar-e-siyah jaan kar

raat bhar apni zulf ke sae se wo Dara kiya

aur main muddaa-talab aish se na-umid ho

shola-e-shama ki tarah sar ko paDa dhuna kiya

mudrika-e-bashar hai kya pae jo us ki kunah ko

chaha jo us ne so kiya kaun kahe ki kya kiya

yani bana ke chashm ko surat-e-shisha-e-hubab

sahib-e-zarf tha jo dil jam-e-jahan-numa kiya

apni shararaton se wo baz na aaya ai 'nasir'

mujh ko rula ke abr san barq-e-namat hansa kiya