dil lage hijr mein kyun kar mera

dil lage hijr meñ kyuuñ kar merā

dil tirā sā nahīñ patthar merā

yuuñ to rūThe haiñ magar logoñ se

pūchhte haal haiñ aksar merā

raah niklegī na kab tak koī

tirī dīvār hai aur sar merā

kahte haiñ aah kī dekheñ tāsīr

na huā vasl mayassar merā

ye to kah kaun sī tadbīr na kī

na huā tū hī sitamgar merā

kyā sunūñ ai dil-e-bad-zan terī

dost hai to vo muqarrar merā

lutf ranjish ke dikhātā tum ko

kyā kahūñ bas nahīñ dil par merā

unheñ milnā nahīñ mujh se manzūr

kis kī taqsīr muqaddar merā

pūchhnā kyā hai chaleñ jaa.eñ aap

zor chaltā nahīñ tum par merā

ġhair kā haal hai kahnā manzūr

kahte haiñ zikr milā kar merā

rashk-e-dushman kā gilā kartā huuñ

hai qusūr is meñ sarāsar merā

ḳhvāhish-e-dil kahīñ bar aa.e 'nizām'

dil ka.ī din se hai muztar merā

dil lage hijr mein kyun kar mera

dil tera sa nahin patthar mera

yun to ruThe hain magar logon se

puchhte haal hain aksar mera

rah niklegi na kab tak koi

teri diwar hai aur sar mera

kahte hain aah ki dekhen tasir

na hua wasl mayassar mera

ye to kah kaun si tadbir na ki

na hua tu hi sitamgar mera

kya sunun ai dil-e-bad-zan teri

dost hai to wo muqarrar mera

lutf ranjish ke dikhata tum ko

kya kahun bas nahin dil par mera

unhen milna nahin mujh se manzur

kis ki taqsir muqaddar mera

puchhna kya hai chalen jaen aap

zor chalta nahin tum par mera

ghair ka haal hai kahna manzur

kahte hain zikr mila kar mera

rashk-e-dushman ka gila karta hun

hai qusur is mein sarasar mera

KHwahish-e-dil kahin bar aae 'nizam'

dil kai din se hai muztar mera