dil mar chuka hai ab na masiha bana karo

dil mar chukā hai ab na masīhā banā karo

yā hañs paḌo yā haath uThā kar duā karo

ab husn ke mizāj se vāqif huā huuñ maiñ

ik bhuul thī jo tum se kahā thā vafā karo

dil bhī sanam-parast nazar bhī sanam-parast

kis kī adā saho to kise rahnumā karo

jis se hujūm-e-ġhair meñ hotī haiñ chashmakeñ

us ajnabī nigāh se bhī āshnā karo

ik soz ik dhuāñ hai pas-e-parda-e-jamāl

tum laakh sham-e-bazm-e-raqībāñ banā karo

qaa.em usī kī zaat se hai rabt-e-zindagī

ai dost ehtirām-e-dil-e-mubtalā karo

taqrīb-e-ishq hai ye dam-e-vāpsīñ nahīñ

tum jaao apnā farz-e-taġhāful adā karo

vo bazm se nikāl ke kahte haiñ ai 'zahīr'

jaao magar qarīb-e-rag-e-jāñ rahā karo

dil mar chuka hai ab na masiha bana karo

ya hans paDo ya hath uTha kar dua karo

ab husn ke mizaj se waqif hua hun main

ek bhul thi jo tum se kaha tha wafa karo

dil bhi sanam-parast nazar bhi sanam-parast

kis ki ada saho to kise rahnuma karo

jis se hujum-e-ghair mein hoti hain chashmaken

us ajnabi nigah se bhi aashna karo

ek soz ek dhuan hai pas-e-parda-e-jamal

tum lakh sham-e-bazm-e-raqiban bana karo

qaem usi ki zat se hai rabt-e-zindagi

ai dost ehtiram-e-dil-e-mubtala karo

taqrib-e-ishq hai ye dam-e-wapsin nahin

tum jao apna farz-e-taghaful ada karo

wo bazm se nikal ke kahte hain ai 'zahir'

jao magar qarib-e-rag-e-jaan raha karo