dil mein yun chah ka arman na hua tha so hua

dil meñ yuuñ chaah kā armāñ na huā thā so huā

jis kī ḳhātir maiñ pareshāñ na huā thā so huā

vo bhī kyā din the ki jab rāhat-e-jāñ thā koī

vaqt bhī mujh se gurezāñ na huā thā so huā

kis ko hai tāb-e-nigāhī tirā jalva dekhe

aa.ina ḳhud bhī to hairāñ na huā thā so huā

ġham-gusārī ke liye ab nahīñ aatā hai koī

zaḳhm bhar jaane kā imkāñ na huā thā so huā

ye bhī e.ajāz-e-mohabbat hai ki vo shoḳh kabhī

vaj.h-e-taskīn-e-dil-o-jāñ na huā thā so huā

jal uThīñ dil meñ tirī yaad kī sham.eñ āḳhir

is ḳharābe meñ charāġhāñ na huā thā so huā

us kī ḳhvāhish kahūñ yā apnī tamannā 'nādir'

bazm meñ us kī ġhazal-ḳhvāñ na huā thā so huā

dil mein yun chah ka arman na hua tha so hua

jis ki KHatir main pareshan na hua tha so hua

wo bhi kya din the ki jab rahat-e-jaan tha koi

waqt bhi mujh se gurezan na hua tha so hua

kis ko hai tab-e-nigahi tera jalwa dekhe

aaina KHud bhi to hairan na hua tha so hua

gham-gusari ke liye ab nahin aata hai koi

zaKHm bhar jaane ka imkan na hua tha so hua

ye bhi eajaz-e-mohabbat hai ki wo shoKH kabhi

wajh-e-taskin-e-dil-o-jaan na hua tha so hua

jal uThin dil mein teri yaad ki shamen aaKHir

is KHarabe mein charaghan na hua tha so hua

us ki KHwahish kahun ya apni tamanna 'nadir'

bazm mein us ki ghazal-KHwan na hua tha so hua