dil se be-sud aur jaan se KHarab

dil se be-sūd aur jaañ se ḳharāb

ho rahā huuñ kahāñ kahāñ se ḳharāb

ġham kī dahlīz hai bhalī kitnī

koī uThtā nahīñ yahāñ se ḳharāb

maiñ mirā aks aur ā.īna

ye nazāra thā darmiyāñ se ḳharāb

ḳhud ko ta.amīr karte karte maiñ

ho gayā huuñ yahāñ vahāñ se ḳharāb

raushnī ik haqīr taare kī

aa ga.ī ho ke kahkashāñ se ḳharāb

zer-e-lab rakh chhupā ke naam us kā

lafz hote haiñ kuchh bayāñ se ḳharāb

ek muddat se huuñ maiñ munkir-e-ishq

aa mujhe kar de apnī haañ se ḳharāb

rañg nikhre haiñ phir vahīñ pe 'bakul'

merī tasvīr thī jahāñ se ḳharāb

dil se be-sud aur jaan se KHarab

ho raha hun kahan kahan se KHarab

gham ki dahliz hai bhali kitni

koi uThta nahin yahan se KHarab

main mera aks aur aaina

ye nazara tha darmiyan se KHarab

KHud ko tamir karte karte main

ho gaya hun yahan wahan se KHarab

raushni ek haqir tare ki

aa gai ho ke kahkashan se KHarab

zer-e-lab rakh chhupa ke nam us ka

lafz hote hain kuchh bayan se KHarab

ek muddat se hun main munkir-e-ishq

aa mujhe kar de apni han se KHarab

rang nikhre hain phir wahin pe 'bakul'

meri taswir thi jahan se KHarab