diye se lau nahin pindar le kar ja rahi hai

diye se lau nahīñ pindār le kar jā rahī hai

havā ab sub.h ke āsār le kar jā rahī hai

hamesha noch letī thī ḳhizāñ shāḳhoñ se patte

magar is baar to ashjār le kar jā rahī hai

maiñ ghar se jā rahā huuñ aur likhtā jā rahā huuñ

jahāñ tak ḳhvāhish-e-dīdār le kar jā rahī hai

ḳhalā meñ ġhaib kī āvāz ne chhoḌā hai mujh ko

maiñ samjhā thā mujhe us paar le kar jā rahī hai

mujhe us niiñd ke māthe kā bosa ho ināyat

jo mujh se ḳhvāb kā āzār le kar jā rahī hai

yahāñ par raat ko achchhā nahīñ kahtā hai koī

so apne kaasa o dīnār le kar jā rahī hai

tamāshe ke sabhī kirdār maare jā chuke haiñ

kahānī sirf ik talvār le kar jā rahī hai

diye se lau nahin pindar le kar ja rahi hai

hawa ab subh ke aasar le kar ja rahi hai

hamesha noch leti thi KHizan shaKHon se patte

magar is bar to ashjar le kar ja rahi hai

main ghar se ja raha hun aur likhta ja raha hun

jahan tak KHwahish-e-didar le kar ja rahi hai

KHala mein ghaib ki aawaz ne chhoDa hai mujh ko

main samjha tha mujhe us par le kar ja rahi hai

mujhe us nind ke mathe ka bosa ho inayat

jo mujh se KHwab ka aazar le kar ja rahi hai

yahan par raat ko achchha nahin kahta hai koi

so apne kasa o dinar le kar ja rahi hai

tamashe ke sabhi kirdar mare ja chuke hain

kahani sirf ek talwar le kar ja rahi hai