ek tarik KHala usMein chamakta hawa main

ek tārīk ḳhalā us meñ chamaktā havā maiñ

ye kahāñ aa gayā hastī se saraktā huā maiñ

shola-e-jāñ se fanā hotā huuñ qatra qatra

apnī āñkhoñ se lahū ban ke Tapaktā huā maiñ

āgahī ne mujhe baḳhshī hai ye nār-e-ḳhud-soz

ik jahannam kī tarah ḳhud meñ bhaḌaktā huā maiñ

muntazir huuñ ki koī aa ke mukammal kar de

chaak par ghūmtā bal khātā daraktā huā maiñ

majma.a ahl-e-haram naqsh-ba-dīvār udhar

aur idhar shor machātā huā baktā huā maiñ

mere hī dam se milī sā.at-e-imkān use

vaqt ke jism meñ dil ban ke dhaḌaktā huā maiñ

be-niyāzī se mirī aate hue tañg ye log

aur logoñ kī tavajjoh se bidaktā huā maiñ

raat kī raat nikal jaatā huuñ ḳhud se bāhar

apne ḳhvāboñ ke ta.āqub meñ humaktā huā maiñ

aisī yakjā.ī ki miT jaa.e tamīz-e-man-o-tū

mujh meñ khiltā huā tū tujh meñ mahaktā huā maiñ

ik to vo husn-e-junūñ-ḳhez hai aalam meñ shuhūd

aur ik husn-e-junūñ-ḳhez ko taktā huā maiñ

ek āvāz paḌī thī ki koī sā.il-e-hijr?

aan kī aan meñ pahuñchā thā lapaktā huā maiñ

hai kashīd-e-suḳhan-e-ḳhās vadī.at mujh ko

ghūmtā phirtā huuñ ye itr chhiḌaktā huā maiñ

rāz-e-haq faash huā mujh pe bhī hote hote

ḳhud tak aa hī gayā 'irfān' bhaTaktā huā maiñ

ek tarik KHala us mein chamakta hawa main

ye kahan aa gaya hasti se sarakta hua main

shola-e-jaan se fana hota hun qatra qatra

apni aankhon se lahu ban ke Tapakta hua main

aagahi ne mujhe baKHshi hai ye nar-e-KHud-soz

ek jahannam ki tarah KHud mein bhaDakta hua main

muntazir hun ki koi aa ke mukammal kar de

chaak par ghumta bal khata darakta hua main

majma ahl-e-haram naqsh-ba-diwar udhar

aur idhar shor machata hua bakta hua main

mere hi dam se mili saat-e-imkan use

waqt ke jism mein dil ban ke dhaDakta hua main

be-niyazi se meri aate hue tang ye log

aur logon ki tawajjoh se bidakta hua main

raat ki raat nikal jata hun KHud se bahar

apne KHwabon ke taaqub mein humakta hua main

aisi yakjai ki miT jae tamiz-e-man-o-tu

mujh mein khilta hua tu tujh mein mahakta hua main

ek to wo husn-e-junun-KHez hai aalam mein shuhud

aur ek husn-e-junun-KHez ko takta hua main

ek aawaz paDi thi ki koi sail-e-hijr?

aan ki aan mein pahuncha tha lapakta hua main

hai kashid-e-suKHan-e-KHas wadiat mujh ko

ghumta phirta hun ye itr chhiDakta hua main

raaz-e-haq fash hua mujh pe bhi hote hote

KHud tak aa hi gaya 'irfan' bhaTakta hua main