gardish-e-jam nahin ruk sakti

gardish-e-jām nahīñ ruk saktī

jo bhī ai gardish-e-daurāñ guzre

sub.h-e-mahshar hai balā-e-zāhir

kisī sūrat shab-e-hijrāñ guzre

koī barsā na sar-e-kisht-e-vafā

kitne bādal guhar-afshāñ guzre

ibn-e-ādam ko na aayā koī raas

ka.ī aazar ka.ī yazdāñ guzre

ai ġham-e-yār tirī rāhoñ se

umr-bhar soḳhta-sāmāñ guzre

vo jo parvāne jale raat kī raat

manzil-e-ishq se āsāñ guzre

ġham-e-hastī ke bayābānoñ se

kuchh hamīñ the jo ġhazal-ḳhvāñ guzre

ġham ke tārīk ufuq par 'ābid'

kuchh sitāre sar-e-mizhgāñ guzre

gardish-e-jam nahin ruk sakti

jo bhi ai gardish-e-dauran guzre

subh-e-mahshar hai bala-e-zahir

kisi surat shab-e-hijran guzre

koi barsa na sar-e-kisht-e-wafa

kitne baadal guhar-afshan guzre

ibn-e-adam ko na aaya koi ras

kai aazar kai yazdan guzre

ai gham-e-yar teri rahon se

umr-bhar soKHta-saman guzre

wo jo parwane jale raat ki raat

manzil-e-ishq se aasan guzre

gham-e-hasti ke bayabanon se

kuchh hamin the jo ghazal-KHwan guzre

gham ke tarik ufuq par 'abid'

kuchh sitare sar-e-mizhgan guzre