hamare sath umid-e-bahaar tum bhi karo

hamāre saath umīd-e-bahār tum bhī karo

is intizār ke dariyā ko paar tum bhī karo

havā kā ruḳh to kisī pal badal bhī saktā hai

us ek pal kā zarā intizār tum bhī karo

maiñ ek jugnū añdherā miTāne niklā huuñ

ridā-e-tīra-shabī taar taar tum bhī karo

tumhārā chehra tumheñ hū-ba-hū dikhā.ūñgā

maiñ aa.ina huuñ mirā e'tibār tum bhī karo

zarā sī baat pe kyā kyā na kho diyā maiñ ne

jo tum ne khoyā hai us kā shumār tum bhī karo

mirī anā to takalluf meñ paash paash huī

duā-e-ḳhair mire haq meñ yaar tum bhī karo

agar maiñ haath milā.ūñ to ye zarūrī hai

ki saaf siine kā apne ġhubār tum bhī karo

koī zarūrī nahīñ hai ki sab kī tarah 'farāġh'

zamāne vaalī ravish iḳhtiyār tum bhī karo

hamare sath umid-e-bahaar tum bhi karo

is intizar ke dariya ko par tum bhi karo

hawa ka ruKH to kisi pal badal bhi sakta hai

us ek pal ka zara intizar tum bhi karo

main ek jugnu andhera miTane nikla hun

rida-e-tira-shabi tar tar tum bhi karo

tumhaara chehra tumhein hu-ba-hu dikhaunga

main aaina hun mera e'tibar tum bhi karo

zara si baat pe kya kya na kho diya main ne

jo tum ne khoya hai us ka shumar tum bhi karo

meri ana to takalluf mein pash pash hui

dua-e-KHair mere haq mein yar tum bhi karo

agar main hath milaun to ye zaruri hai

ki saf sine ka apne ghubar tum bhi karo

koi zaruri nahin hai ki sab ki tarah 'faragh'

zamane wali rawish iKHtiyar tum bhi karo