har lamha sairabi ki arzani hai

har lamha sairābī kī arzānī hai

miTTī ke kuuze meñ ThanDā paanī hai

chupke chupke rotā hai tanhā.ī meñ

vo jo shahr ke har mele kā baanī hai

nadī kināre shahr panāheñ bāloñ kī

sāvan kī bauchhāreñ haiñ tuġhyānī hai

bāhar dhuup samundar surḳh bagūle bhī

andar har ḳhuliye meñ rut barfānī hai

us ne har zarre ko tilism-ābād kiyā

haath hamāre lagī faqat hairānī hai

mere dasht ko shāyad us ne dekh liyā

dhuup shabnamī har-sū manzar dhānī hai

jaane kyā barsā thā raat charāġhoñ se

bhor samay sūraj bhī paanī paanī hai

us ne har lamha ḳhud ko yuuñ raam kiyā

har paikar meñ us kī rām-kahānī hai

kachchā ghar aatā hai yaad bahut 'amabar'

kahne ko shahroñ meñ har āsānī hai

har lamha sairabi ki arzani hai

miTTi ke kuze mein ThanDa pani hai

chupke chupke rota hai tanhai mein

wo jo shahr ke har mele ka bani hai

nadi kinare shahr panahen baalon ki

sawan ki bauchhaaren hain tughyani hai

bahar dhup samundar surKH bagule bhi

andar har KHuliye mein rut barfani hai

us ne har zarre ko tilism-abaad kiya

hath hamare lagi faqat hairani hai

mere dasht ko shayad us ne dekh liya

dhup shabnami har-su manzar dhani hai

jaane kya barsa tha raat charaghon se

bhor samay suraj bhi pani pani hai

us ne har lamha KHud ko yun ram kiya

har paikar mein us ki ram-kahani hai

kachcha ghar aata hai yaad bahut 'amabar'

kahne ko shahron mein har aasani hai