hisar-e-maqtal-e-jaan mein lahu lahu main tha

hisār-e-maqtal-e-jāñ meñ lahū lahū maiñ thā

rasan rasan mirī vahshat gulū gulū maiñ thā

jo rah gayā nigah-e-sozan-e-mashiyyat se

qabā-e-zīst kā vo chāk-e-be-rafū maiñ thā

zamāna hañstā rahā merī ḳhud-kalāmī par

tire ḳhayāl se masrūf-e-guftugū maiñ thā

thā aa.ine meñ shikast-e-ġhurūr-e-yaktā.ī

ki apne aks ke parde meñ hū-ba-hū maiñ thā

tū apnī zaat ke har pech-o-ḳham se pūchh ke dekh

qadam qadam mirī aahaT thī kū-ba-kū maiñ thā

har ek vādī-o-kohsār se guzartā huā

jo ābshār banā thā vo aabjū maiñ thā

ḳhutan ḳhutan thī shalañg-e-ġhazāl mere liye

badan badan mirā nashsha subū subū maiñ thā

tamām umr kī dīvāngī ke ba.ad khulā

maiñ terī zaat meñ pinhāñ thā aur tū maiñ thā

ma.āl-e-umr-e-mohabbat hai bas yahī 'tishna'

mirī talāsh thā vo us kī justujū maiñ thā

hisar-e-maqtal-e-jaan mein lahu lahu main tha

rasan rasan meri wahshat gulu gulu main tha

jo rah gaya nigah-e-sozan-e-mashiyyat se

qaba-e-zist ka wo chaak-e-be-rafu main tha

zamana hansta raha meri KHud-kalami par

tere KHayal se masruf-e-guftugu main tha

tha aaine mein shikast-e-ghurur-e-yaktai

ki apne aks ke parde mein hu-ba-hu main tha

tu apni zat ke har pech-o-KHam se puchh ke dekh

qadam qadam meri aahaT thi ku-ba-ku main tha

har ek wadi-o-kohsar se guzarta hua

jo aabshaar bana tha wo aabju main tha

KHutan KHutan thi shalang-e-ghazal mere liye

badan badan mera nashsha subu subu main tha

tamam umr ki diwangi ke baad khula

main teri zat mein pinhan tha aur tu main tha

maal-e-umr-e-mohabbat hai bas yahi 'tishna'

meri talash tha wo us ki justuju main tha