inkishaf-e-zat ke aage dhuan hai aur bas

inkishāf-e-zāt ke aage dhuāñ hai aur bas

ek tū hai ek maiñ huuñ āsmāñ hai aur bas

ā.īna-ḳhānoñ meñ raqsinda rumūz-e-āgahī

os meñ bhīgā huā merā gumāñ hai aur bas

canvas par hai ye kis kā paikar-e-harf-o-sadā

ik numūd-e-ārzū jo be-nishāñ hai aur bas

hairatoñ kī sab se pahlī saf meñ ḳhud maiñ bhī to huuñ

jaane kyuuñ har ek manzar be-zabāñ hai aur bas

ajnabī lams-e-badan kī reñgtī haiñ chyūñTiyāñ

kuchh nahīñ hai sā.at-e-mauj-e-ravāñ hai aur bas

inkishaf-e-zat ke aage dhuan hai aur bas

ek tu hai ek main hun aasman hai aur bas

aaina-KHanon mein raqsinda rumuz-e-agahi

os mein bhiga hua mera guman hai aur bas

canwas par hai ye kis ka paikar-e-harf-o-sada

ek numud-e-arzu jo be-nishan hai aur bas

hairaton ki sab se pahli saf mein KHud main bhi to hun

jaane kyun har ek manzar be-zaban hai aur bas

ajnabi lams-e-badan ki rengti hain chyunTiyan

kuchh nahin hai saat-e-mauj-e-rawan hai aur bas