intishaar-o-KHauf har ek sar mein hai

intishār-o-ḳhauf har ik sar meñ hai

āfiyat se kaun apne ghar meñ hai

zindagī par sab haqīqat khul chukī

tū abhī tak ḳhvāb ke paikar meñ hai

mutma.in insāñ kahīñ par bhī nahīñ

ek sī hālat zamāne bhar meñ hai

raat kī chaTTān se sub.heñ tarāsh

ḳhvāb kī ta.abīr isī patthar meñ hai

jhuuT kī ban aa.ī hai chāroñ taraf

sach agar hai bhī to pas-manzar meñ hai

barf ehsāsāt kī pighlā sake

vo sharar maazī kī ḳhākistar meñ hai

TuuT jaane tak uḌeñge ham 'niyāz'

hausla itnā to bāl-o-par meñ hai

intishaar-o-KHauf har ek sar mein hai

aafiyat se kaun apne ghar mein hai

zindagi par sab haqiqat khul chuki

tu abhi tak KHwab ke paikar mein hai

mutmain insan kahin par bhi nahin

ek si haalat zamane bhar mein hai

raat ki chaTTan se subhen tarash

KHwab ki tabir isi patthar mein hai

jhuT ki ban aai hai chaaron taraf

sach agar hai bhi to pas-manzar mein hai

barf ehsasat ki pighla sake

wo sharar mazi ki KHakistar mein hai

TuT jaane tak uDenge hum 'niyaz'

hausla itna to baal-o-par mein hai