is shahr ke log ajib se hain ab sab hi tumhaare asir hue

is shahr ke log ajiib se haiñ ab sab hī tumhāre asiir hue

jab jaañ pe baraste the patthar us vaqt hamīñ dil-gīr hue

kuchh log tumhārī āñkhoñ se karte haiñ talab hiire motī

ham sahrā sahrā Duub ga.e ik aan meñ jogī faqīr hue

tum dard kī lazzat kyā jaano kab tum ne chakhe haiñ zahr-e-subū

ham apne vajūd ke shāhid haiñ sañgsār hue shamshīr hue

ye pahroñ pahroñ soch-nagar rātoñ rātoñ be-ḳhvāb lahar

phir kaise kaTegā dhūp-safar jab piir luTī jāgīr hue

ik umr guzārī hai yuuñ hī sāyoñ ke ta.āqub meñ ham ne

Tuk baiTh ga.e phir chal nikle hañs bol liye dil-gīr hue

kuchh shahr tumhārā tañg bhī thā kuchh tum bhī the kamzor zarā

patthar kī nigāhoñ ke Dar se tum apne hī ghar meñ asiir hue

is shahr ke log ajib se hain ab sab hi tumhaare asir hue

jab jaan pe baraste the patthar us waqt hamin dil-gir hue

kuchh log tumhaari aankhon se karte hain talab hire moti

hum sahra sahra Dub gae ek aan mein jogi faqir hue

tum dard ki lazzat kya jaano kab tum ne chakhe hain zahr-e-subu

hum apne wajud ke shahid hain sangsar hue shamshir hue

ye pahron pahron soch-nagar raaton raaton be-KHwab lahar

phir kaise kaTega dhup-safar jab pir luTi jagir hue

ek umr guzari hai yun hi sayon ke taaqub mein hum ne

Tuk baiTh gae phir chal nikle hans bol liye dil-gir hue

kuchh shahr tumhaara tang bhi tha kuchh tum bhi the kamzor zara

patthar ki nigahon ke Dar se tum apne hi ghar mein asir hue