itna be-nafa nahin us se bichhaDna mera

itnā be-naf.a nahīñ us se bichhaḌnā merā

anjuman-sāz huā hai dil-e-tanhā merā

sar-nigūñ hone nahīñ detā ye ehsās mujhe

maiñ to TuuTā huuñ magar ḳhvāb na TuuTā merā

kaun haiñ vo jinheñ āfāq kī vus.at kam hai

ye samundar na ye dariyā na ye sahrā merā

ek hī lamha-e-maujūd meñ maujūd huuñ maiñ

aur ik lamhe kā honā hai na honā merā

dil meñ sau tiir tarāzū hue tab jā ke khulā

is qadar sahl na thā jaañ se guzarnā merā

kaise tarsīl-e-suḳhan kī koī sūrat nikle

ye zabāñ merī nahīñ hai na ye lahja merā

maiñ abhī sair-e-jahāñ-bīnī meñ gum huuñ 'ashfāq'

āsmāñ dekh rahā hai abhī rasta merā

itna be-nafa nahin us se bichhaDna mera

anjuman-saz hua hai dil-e-tanha mera

sar-nigun hone nahin deta ye ehsas mujhe

main to TuTa hun magar KHwab na TuTa mera

kaun hain wo jinhen aafaq ki wusat kam hai

ye samundar na ye dariya na ye sahra mera

ek hi lamha-e-maujud mein maujud hun main

aur ek lamhe ka hona hai na hona mera

dil mein sau tir taraazu hue tab ja ke khula

is qadar sahl na tha jaan se guzarna mera

kaise tarsil-e-suKHan ki koi surat nikle

ye zaban meri nahin hai na ye lahja mera

main abhi sair-e-jahan-bini mein gum hun 'ashfaq'

aasman dekh raha hai abhi rasta mera