jahan kuchh dard ka mazkur hoga

jahāñ kuchh dard kā mazkūr hogā

hamārā sher bhī mash.hūr hogā

jahāñ meñ husn par do din ke ai gul

koī tujh sā bhī kam maġhrūr hogā

paḌeñge yuuñ hī sañg-e-tafraqa gar

to ik din shīsha-e-dil chuur hogā

mujhe kal ḳhāk-afshāñ dekh bolā

yahī ushshāq kā dastūr hogā

huā huuñ marg ke nazdīk ġham se

ḳhudā jaane ye kis din duur hogā

vahī samjhegā mere zaḳhm-e-dil ko

jigar par jis ke ik nāsūr hogā

hameñ paimāna tab ye degā saaqī

ki jām-e-umr jab ma.amūr hogā

jo yuuñ ġham nīsh-zan har dam rahegā

to phir dil ḳhāna-e-zambūr hogā

yahī ronā hai gar manzūr 'jur.at'

to bīnā.ī se tū ma.azūr hogā

jahan kuchh dard ka mazkur hoga

hamara sher bhi mashhur hoga

jahan mein husn par do din ke ai gul

koi tujh sa bhi kam maghrur hoga

paDenge yun hi sang-e-tafraqa gar

to ek din shisha-e-dil chur hoga

mujhe kal KHak-afshan dekh bola

yahi ushshaq ka dastur hoga

hua hun marg ke nazdik gham se

KHuda jaane ye kis din dur hoga

wahi samjhega mere zaKHm-e-dil ko

jigar par jis ke ek nasur hoga

hamein paimana tab ye dega saqi

ki jam-e-umr jab mamur hoga

jo yun gham nish-zan har dam rahega

to phir dil KHana-e-zambur hoga

yahi rona hai gar manzur 'jurat'

to binai se tu mazur hoga