jaise koi daera takmil par hai

jaise koī dā.era takmīl par hai

in dinoñ mujh par guzishta kā asar hai

zindagī kī band siipī khul rahī hai

aur us meñ ahd-e-tiflī kā guhar hai

dil hai rāz-o-ramz kī duniyā meñ shādāñ

aql ko har aan tashvīsh-e-ḳhabar hai

ik tavaqquf-zār meñ gum hai tasalsul

lamha-e-maujūd goyā umr bhar hai

zehan meñ rauzan anokhe khul rahe haiñ

jin se an-sochī havāoñ kā guzar hai

fāsle taqsīm hī hote nahīñ jab

'sāz' phir kyā sust-rau kyā tez-tar hai

jaise koi daera takmil par hai

in dinon mujh par guzishta ka asar hai

zindagi ki band sipi khul rahi hai

aur us mein ahd-e-tifli ka guhar hai

dil hai raaz-o-ramz ki duniya mein shadan

aql ko har aan tashwish-e-KHabar hai

ek tawaqquf-zar mein gum hai tasalsul

lamha-e-maujud goya umr bhar hai

zehan mein rauzan anokhe khul rahe hain

jin se an-sochi hawaon ka guzar hai

fasle taqsim hi hote nahin jab

'saz' phir kya sust-rau kya tez-tar hai