jalte hue jangal se guzarna tha hamein bhi

jalte hue jangal se guzarnā thā hameñ bhī

phir barf ke sahrā meñ Thaharnā thā hameñ bhī

me'yār-navāzī meñ kahāñ us ko sukūñ thā

us shoḳh kī nazroñ se utarnā thā hameñ bhī

jaañ baḳhsh thā pal bhar ke liye lams kisī kā

phir karb ke dariyā meñ utarnā thā hameñ bhī

yāroñ kī nazar hī meñ na the pankh hamāre

ḳhud apnī uḌānoñ ko katarnā thā hameñ bhī

vo shahd meñ Duubā huā lahja vo taḳhātub

iḳhlās ke vo rang ki Darnā thā hameñ bhī

yaad aa.e jo qadroñ ke mahakte hue gulban

chāñdī ke hisāroñ se ubharnā thā hameñ bhī

sone ke hiñDole meñ vo ḳhush-posh magan thā

mausam bhī suhānā thā sañvarnā thā hameñ bhī

har phuul pe us shaḳhs ko patthar the chalāne

ashkoñ se har ik barg ko bharnā thā hameñ bhī

us ko thā bahut naaz ḳhad-o-ḳhāl pe 'ambar'

ik roz tah-e-ḳhāk bikharnā thā hameñ bhī

jalte hue jangal se guzarna tha hamein bhi

phir barf ke sahra mein Thaharna tha hamein bhi

me'yar-nawazi mein kahan us ko sukun tha

us shoKH ki nazron se utarna tha hamein bhi

jaan baKHsh tha pal bhar ke liye lams kisi ka

phir karb ke dariya mein utarna tha hamein bhi

yaron ki nazar hi mein na the pankh hamare

KHud apni uDanon ko katarna tha hamein bhi

wo shahd mein Duba hua lahja wo taKHatub

iKHlas ke wo rang ki Darna tha hamein bhi

yaad aae jo qadron ke mahakte hue gulban

chandi ke hisaron se ubharna tha hamein bhi

sone ke hinDole mein wo KHush-posh magan tha

mausam bhi suhana tha sanwarna tha hamein bhi

har phul pe us shaKHs ko patthar the chalane

ashkon se har ek barg ko bharna tha hamein bhi

us ko tha bahut naz KHad-o-KHal pe 'ambar'

ek roz tah-e-KHak bikharna tha hamein bhi