jawab jis ka nahin koi wo sawal bana

javāb jis kā nahīñ koī vo savāl banā

maiñ ḳhvāb meñ use dekhūñ koī ḳhayāl banā

maiñ e'tirāf ke mausam meñ chup nahīñ rahtā

mire ḳhudā mirī hastī ke ḳhadd-o-ḳhāl banā

vo kaun hai jo mirī hijratoñ se TuuT gayā

vo kaun shaḳhs hai jo ā.īna-misāl banā

vo kis ke dhyān meñ aayā thā mausamoñ kī tarah

vo kaun hai jo mirī soch kā ḳhayāl banā

maiñ kis yaqīn se likkhā gayā huuñ miTTī par

vo kaun hai jo mire silsile kī Dhaal banā

tū iztirāb ke rañgoñ se āshnā hī nahīñ

bas ek til ke liye zā.iche meñ gaal banā

maiñ kho gayā huuñ kahīñ vaqt ke tahayyur meñ

mire ḳhudā mire din raat maah o saal banā

jawab jis ka nahin koi wo sawal bana

main KHwab mein use dekhun koi KHayal bana

main e'tiraf ke mausam mein chup nahin rahta

mere KHuda meri hasti ke KHadd-o-KHal bana

wo kaun hai jo meri hijraton se TuT gaya

wo kaun shaKHs hai jo aaina-misal bana

wo kis ke dhyan mein aaya tha mausamon ki tarah

wo kaun hai jo meri soch ka KHayal bana

main kis yaqin se likkha gaya hun miTTi par

wo kaun hai jo mere silsile ki Dhaal bana

tu iztirab ke rangon se aashna hi nahin

bas ek til ke liye zaiche mein gal bana

main kho gaya hun kahin waqt ke tahayyur mein

mere KHuda mere din raat mah o sal bana