jine ka na kuchh hosh na marne ki KHabar hai

jiine kā na kuchh hosh na marne kī ḳhabar hai

ai shobada-pardāz ye kyā tarz-e-nazar hai

siine meñ yahāñ dil hai na pahlū meñ jigar hai

ab kaun hai jo tishna-e-paikān-e-nazar hai

hai tābish-e-anvār se aalam tah-o-bālā

jalva vo abhī tak tah-e-dāmān-e-nazar hai

kuchh milte haiñ ab puḳhtagi-e-ishq ke āsār

nāloñ meñ rasā.ī hai na aahoñ meñ asar hai

zarroñ ko yahāñ chain na ajrām-e-falak ko

ye qāfila be-tāb kahāñ garm-e-safar hai

ḳhāmosh ye hairat-kada-e-dahr hai 'asġhar'

jo kuchh nazar aatā hai vo sab tarz-e-nazar hai

jine ka na kuchh hosh na marne ki KHabar hai

ai shobada-pardaz ye kya tarz-e-nazar hai

sine mein yahan dil hai na pahlu mein jigar hai

ab kaun hai jo tishna-e-paikan-e-nazar hai

hai tabish-e-anwar se aalam tah-o-baala

jalwa wo abhi tak tah-e-daman-e-nazar hai

kuchh milte hain ab puKHtagi-e-ishq ke aasar

nalon mein rasai hai na aahon mein asar hai

zarron ko yahan chain na ajram-e-falak ko

ye qafila be-tab kahan garm-e-safar hai

KHamosh ye hairat-kada-e-dahr hai 'asghar'

jo kuchh nazar aata hai wo sab tarz-e-nazar hai