jism ki sath pe tufan kiya jaega

jism kī sat.h pe tūfān kiyā jā.egā

apne hone kā phir elaan kiyā jā.egā

ham raheñge abhī is ā.ina-ḳhāne meñ asiir

abhī kuchh din hameñ hairān kiyā jā.egā

sāmne se koī bijlī sī guzar jā.egī

mere andar koī haijān kiyā jā.egā

manzil-e-ḳhāk pe jaanā hai isī shart ke saath

ye safar be-sar-o-sāmān kiyā jā.egā

aa rahā hogā vo dāman se havā bāñdhe hue

aaj ḳhushbū ko pareshān kiyā jā.egā

jism ki sath pe tufan kiya jaega

apne hone ka phir elan kiya jaega

hum rahenge abhi is aaina-KHane mein asir

abhi kuchh din hamein hairan kiya jaega

samne se koi bijli si guzar jaegi

mere andar koi haijaan kiya jaega

manzil-e-KHak pe jaana hai isi shart ke sath

ye safar be-sar-o-saman kiya jaega

aa raha hoga wo daman se hawa bandhe hue

aaj KHushbu ko pareshan kiya jaega