kafan ki jeb bhi Khaali nahin hai

kafan kī jeb bhī ḳhālī nahīñ hai

ye bad-halī hai ḳhush-hālī nahīñ hai

to kyā ye phuul ḳhud hī khil gayā thā

jo kahtā hai koī maalī nahīñ hai

unheñ mat dekh ḳhush rahne de un ko

tirī ḳhātir ye dīvālī nahīñ hai

tirī tasvīr jhūTī hai musavvir

mire shahroñ meñ hariyālī nahīñ hai

vo ghar girne lagā hai jis kī ham ne

abhī buniyād bhī Daalī nahīñ hai

to kyā mujh ko sazā degā vo jis ne

mirī ik baat bhī Taalī nahīñ hai

tire baare meñ jab sochā to dekhā

ye raat aisī bhī ab kaalī nahīñ hai

na kar 'momin' yahāñ koī tamāshā

ye duniyā dekhne vaalī nahīñ hai

kafan ki jeb bhi KHali nahin hai

ye bad-hali hai KHush-haali nahin hai

to kya ye phul KHud hi khil gaya tha

jo kahta hai koi mali nahin hai

unhen mat dekh KHush rahne de un ko

teri KHatir ye diwali nahin hai

teri taswir jhuTi hai musawwir

mere shahron mein hariyali nahin hai

wo ghar girne laga hai jis ki hum ne

abhi buniyaad bhi Dali nahin hai

to kya mujh ko saza dega wo jis ne

meri ek baat bhi Tali nahin hai

tere bare mein jab socha to dekha

ye raat aisi bhi ab kali nahin hai

na kar 'momin' yahan koi tamasha

ye duniya dekhne wali nahin hai