KHair ka tujhko yaqin hai aur usko shar ka hai

ḳhair kā tujh ko yaqīñ hai aur us ko shar kā hai

donoñ haq par haiñ ki jhagḌā sirf pas-manzar kā hai

āñsuoñ se tū hai ḳhālī dard se aarī huuñ maiñ

terī āñkheñ kāñch kī haiñ merā dil patthar kā hai

kaun dafnātā use vo ik barahana laash thī

sab ne pūchhā kaun hai vo kaun se lashkar kā hai

tū sukūñ se thak gayā hai aur betābī se maiñ

shauq hai tujh ko safar kā aur mujh ko ghar kā hai

ek paudā sehn meñ thā dhuup khā kar jal gayā

sirf merā hī nahīñ hai rañj ye ghar bhar kā hai

sochtā rahtā huuñ maiñ terī uḌāneñ dekh kar

ye havā kā zor hai yā tere bāl-o-par kā hai

ek būḌhe ne kiyā asr-e-ravāñ pe tabsira

ye zamāna aadmī kā hai ki zor-o-zar kā hai

maiñ ne sīñchā hai lahū se is dil-e-sar-sabz ko

umr bhar se ye ilāqa merī chashm-e-tar kā hai

maiñ simaT kar leTtā huuñ bistar-e-idrāk par

paañv phailā.ūñ to andesha mujhe chādar kā hai

is masāfat kā mudāvā tujh se bhī mumkin nahīñ

zaḳhm-e-dil se kuchh ziyāda zaḳhm mere sar kā hai

ik tabīb-e-ādmiyat ne kahā hai saaf saaf

zahr duniyā kī ragoñ meñ sab fasād-e-zar kā hai

dekh kar insān ko kahtī hai saarī kā.enāt

ye to ham meñ se nahīñ hai ye koī bāhar kā hai

saarī kaḌiyāñ toḌ diiñ maiñ ne mohabbat ke sivā

kaun toḌegā ise ye jabr to andar kā hai

KHair ka tujh ko yaqin hai aur us ko shar ka hai

donon haq par hain ki jhagDa sirf pas-manzar ka hai

aansuon se tu hai KHali dard se aari hun main

teri aankhen kanch ki hain mera dil patthar ka hai

kaun dafnata use wo ek barahana lash thi

sab ne puchha kaun hai wo kaun se lashkar ka hai

tu sukun se thak gaya hai aur betabi se main

shauq hai tujh ko safar ka aur mujh ko ghar ka hai

ek pauda sehn mein tha dhup kha kar jal gaya

sirf mera hi nahin hai ranj ye ghar bhar ka hai

sochta rahta hun main teri uDanen dekh kar

ye hawa ka zor hai ya tere baal-o-par ka hai

ek buDhe ne kiya asr-e-rawan pe tabsira

ye zamana aadmi ka hai ki zor-o-zar ka hai

main ne sincha hai lahu se is dil-e-sar-sabz ko

umr bhar se ye ilaqa meri chashm-e-tar ka hai

main simaT kar leTta hun bistar-e-idrak par

panw phailaun to andesha mujhe chadar ka hai

is masafat ka mudawa tujh se bhi mumkin nahin

zaKHm-e-dil se kuchh ziyaada zaKHm mere sar ka hai

ek tabib-e-admiyat ne kaha hai saf saf

zahr duniya ki ragon mein sab fasad-e-zar ka hai

dekh kar insan ko kahti hai sari kaenat

ye to hum mein se nahin hai ye koi bahar ka hai

sari kaDiyan toD din main ne mohabbat ke siwa

kaun toDega ise ye jabr to andar ka hai