kis kis se dosti hui ye dhyan mein nahin

kis kis se dostī huī ye dhyān meñ nahīñ

un meñ se ek bhī mire sāmān meñ nahīñ

rasm-e-vafā kā us se nibhānā bhī hai muhāl

tark-e-ta.alluqāt bhī imkān meñ nahīñ

bāñdheñ kisī se ahd-e-vafā ham to kis tarah

ik taar bhī to apne garebān meñ nahīñ

kyuuñ ham ne haar maan lī kyuuñ Daal dī sipar

ye sāneha shikast ke elaan meñ nahīñ

ye jaañ supurdagī hai usī ek baat par

jo baat mere ishq ke paimān meñ nahīñ

shorīdgī ko haiñ sabhī āsūdgī nasīb

vo shahr meñ hai kyā jo bayābān meñ nahīñ

'tishna' vo shab likhī hai hamāre nasīb meñ

jis kī sahar kā zikr bhī imkān meñ nahīñ

kis kis se dosti hui ye dhyan mein nahin

un mein se ek bhi mere saman mein nahin

rasm-e-wafa ka us se nibhana bhi hai muhaal

tark-e-talluqat bhi imkan mein nahin

bandhen kisi se ahd-e-wafa hum to kis tarah

ek tar bhi to apne gareban mein nahin

kyun hum ne haar man li kyun Dal di sipar

ye saneha shikast ke elan mein nahin

ye jaan supurdagi hai usi ek baat par

jo baat mere ishq ke paiman mein nahin

shoridgi ko hain sabhi aasudgi nasib

wo shahr mein hai kya jo bayaban mein nahin

'tishna' wo shab likhi hai hamare nasib mein

jis ki sahar ka zikr bhi imkan mein nahin