kisi kashish ke kisi silsile ka hona tha

kisī kashish ke kisī silsile kā honā thā

hameñ bhī āḳhirash ik dā.ere kā honā thā

abhī se achchhā huā raat so ga.ī varna

kabhī to ḳhatm-e-safar ratjage kā honā thā

barahna-tan baḌī guzrī thī zindagī apnī

libās ham ko hī ik dūsre kā honā thā

ham apnā dīda-e-bīnā pahan ke nikle the

saḌak ke biich kisī hādse kā honā thā

hamāre paañv se lipTī huī qayāmat thī

qadam qadam pe kisī zalzale kā honā thā

ham apne sāmne har lamha marte rahte the

hamāre dil meñ kisī maqbare kā honā thā

tamām raat bulātā rahā hai ik taara

ufuq ke paar kisī mo'jize kā honā thā

kisī ke sāmne uTThī nazar to bah niklā

hamārī aañkh meñ kyā aable kā honā thā

hisār-e-shahr se bāhar nikal hī aa.e haiñ

kabhī hameñ bhī kisī rāste kā honā thā

kisi kashish ke kisi silsile ka hona tha

hamein bhi aaKHirash ek daere ka hona tha

abhi se achchha hua raat so gai warna

kabhi to KHatm-e-safar ratjage ka hona tha

barahna-tan baDi guzri thi zindagi apni

libas hum ko hi ek dusre ka hona tha

hum apna dida-e-bina pahan ke nikle the

saDak ke bich kisi hadse ka hona tha

hamare panw se lipTi hui qayamat thi

qadam qadam pe kisi zalzale ka hona tha

hum apne samne har lamha marte rahte the

hamare dil mein kisi maqbare ka hona tha

tamam raat bulata raha hai ek tara

ufuq ke par kisi mo'jize ka hona tha

kisi ke samne uTThi nazar to bah nikla

hamari aankh mein kya aable ka hona tha

hisar-e-shahr se bahar nikal hi aae hain

kabhi hamein bhi kisi raste ka hona tha