kitna jaan-soz hai manzar meri tanhai ka

kitnā jāñ-soz hai manzar mirī tanhā.ī kā

hausla mujh meñ nahīñ anjuman-ārā.ī kā

maiñ ne samjhā thā jise bā.is-e-taskīn-e-nazar

us ne sāmān kiyā hai mirī rusvā.ī kā

merī bātoñ meñ nayā rañg kahāñ se aa.e

mere dil meñ bhī hai ik zaḳhm shanāsā.ī kā

baat to jab hai ki jazboñ se sadāqat phūTe

yuuñ to da.avā hai har ik shaḳhs ko sachchā.ī kā

ruuh meñ jazba-e-ulfat ko fuzūñ paatā huuñ

jab ḳhayāl aatā hai mujh ko tirī ra.anā.ī kā

ai 'ḳhayāl' ātish-e-ehsās bhaḌak jā.egī

aap da.avā na kareñ dhuup meñ dānā.ī kā

kitna jaan-soz hai manzar meri tanhai ka

hausla mujh mein nahin anjuman-arai ka

main ne samjha tha jise bais-e-taskin-e-nazar

us ne saman kiya hai meri ruswai ka

meri baaton mein naya rang kahan se aae

mere dil mein bhi hai ek zaKHm shanasai ka

baat to jab hai ki jazbon se sadaqat phuTe

yun to dawa hai har ek shaKHs ko sachchai ka

ruh mein jazba-e-ulfat ko fuzun pata hun

jab KHayal aata hai mujh ko teri ranai ka

ai 'KHayal' aatish-e-ehsas bhaDak jaegi

aap dawa na karen dhup mein danai ka