koī tāsīr to hai is kī navā meñ aisī
raushnī pahle na thī dil kī fazā meñ aisī
aur phir us ke ta.āqub meñ huī umr tamām
ek tasvīr uḌī tez havā meñ aisī
jaise vīrān havelī meñ hoñ ḳhāmosh charāġh
ab guzartī haiñ tire shahr meñ shāmeñ aisī
aañkh masrūf hai zambīl-e-hunar bharne meñ
kis ne rakkhī hai kashish arz o samā meñ aisī
ulTī jānib ko safar karne lagā har manzar
sansanī phail ga.ī rāh-e-fanā meñ aisī
kahkashā.eñ bhī tahayyur se nikal saktī nahīñ
chhoḌ aayā huuñ ka.ī nazreñ ḳhalā meñ aisī
yahīñ aanā hai bhaTaktī huī āvāzoñ ko
ya.anī kuchh baat to hai koh-e-nidā meñ aisī
koi tasir to hai is ki nawa mein aisi
raushni pahle na thi dil ki faza mein aisi
aur phir us ke taaqub mein hui umr tamam
ek taswir uDi tez hawa mein aisi
jaise viran haweli mein hon KHamosh charagh
ab guzarti hain tere shahr mein shamen aisi
aankh masruf hai zambil-e-hunar bharne mein
kis ne rakkhi hai kashish arz o sama mein aisi
ulTi jaanib ko safar karne laga har manzar
sansani phail gai rah-e-fana mein aisi
kahkashaen bhi tahayyur se nikal sakti nahin
chhoD aaya hun kai nazren KHala mein aisi
yahin aana hai bhaTakti hui aawazon ko
yani kuchh baat to hai koh-e-nida mein aisi
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.
