kya bataun ki main chup-chup sa kya sunta hun

kyā batā.ūñ ki maiñ chup-chup sā kyā suntā huuñ

apne andar se bikharne kī sadā suntā huuñ

sab ke so jaane pe aflāk se kyā kahtā hai

raat ko ek parinde kī sadā suntā huuñ

ik ajab sā hai sukūt aur sadā kā sañgam

mahviyat meñ kabhī ik aisī navā suntā huuñ

naaz hai mujh ko ki āġhāz-e-tajassus huuñ maiñ

mujh se pahle bhī koī thā ye maiñ kyā suntā huuñ

kabhī aatī nahīñ apne kahīñ hone kī sadā

gaah peḌoñ kī bhī sāñsoñ kī sadā suntā huuñ

aa rahī hai mujhe phir jaise sadā-e-atrāf

phir maiñ jaise koī paiġhām nayā suntā huuñ

shaam ko 'talḳh' ye fitrat se suḳhan karne meñ

kyā kahūñ chup kī sadā boltā yā suntā huuñ

kya bataun ki main chup-chup sa kya sunta hun

apne andar se bikharne ki sada sunta hun

sab ke so jaane pe aflak se kya kahta hai

raat ko ek parinde ki sada sunta hun

ek ajab sa hai sukut aur sada ka sangam

mahwiyat mein kabhi ek aisi nawa sunta hun

naz hai mujh ko ki aaghaz-e-tajassus hun main

mujh se pahle bhi koi tha ye main kya sunta hun

kabhi aati nahin apne kahin hone ki sada

gah peDon ki bhi sanson ki sada sunta hun

aa rahi hai mujhe phir jaise sada-e-atraf

phir main jaise koi paigham naya sunta hun

sham ko 'talKH' ye fitrat se suKHan karne mein

kya kahun chup ki sada bolta ya sunta hun