main jahan jaun mere sath chale sannaTa

maiñ jahāñ jā.ūñ mire saath chale sannāTā

merī āñkhoñ meñ lagātār jale sannāTā

sub.h aatī hai dabe paañv chalī jaatī hai

gher letā hai mujhe shaam Dhale sannāTā

bhāgtī bhiiḌ ke qadmoñ se lipaT kar ro.e

varna har sust musāfir ko chhale sannāTā

tum ḳhayālāt ke ḳhemoñ meñ simaT mat jaanā

jab sar-e-rāh kabhī haath male sannāTā

phir mire shahr meñ lauT aa.ī hai dahshat-gardī

phir har ik jism ke saa.e meñ pale sannāTā

ab makānoñ kī chhatoñ kā bhī nazāra kar lo

gungunātā hai sitāroñ ke tale sannāTā

āj-kal un ke Thikānoñ meñ baḌī halchal hai

kaash mere bhī shabistāñ se Tale sannāTā

main jahan jaun mere sath chale sannaTa

meri aankhon mein lagatar jale sannaTa

subh aati hai dabe panw chali jati hai

gher leta hai mujhe sham Dhale sannaTa

bhagti bhiD ke qadmon se lipaT kar roe

warna har sust musafir ko chhale sannaTa

tum KHayalat ke KHemon mein simaT mat jaana

jab sar-e-rah kabhi hath male sannaTa

phir mere shahr mein lauT aai hai dahshat-gardi

phir har ek jism ke sae mein pale sannaTa

ab makanon ki chhaton ka bhi nazara kar lo

gungunata hai sitaron ke tale sannaTa

aaj-kal un ke Thikanon mein baDi halchal hai

kash mere bhi shabistan se Tale sannaTa