main pareshan hun milen chand niwale kaise

maiñ pareshāñ huuñ mileñ chand nivāle kaise

us ko daulat vo milī hai ki sambhāle kaise

uñgliyāñ apnī nagīnoñ se sajāne vaale

tujh ko lagte haiñ mire haath ke chhāle kaise

ilm se pher liiñ tū ne jo nigāheñ apnī

phir tire zehn meñ phūTeñge ujāle kaise

dekhte rah ga.e paanī kī ravānī ham log

rāste logoñ ne dariyā meñ nikāle kaise

umr lag jaatī hai ik ghar ko banāne meñ hameñ

makaḌiyāñ roz hī bun letī haiñ jaale kaise

tū ne 'aḳhlāq' qasam khaa.ī thī zabt-e-ġham kī

phir ye palkoñ pe namī hoñToñ pe naale kaise

main pareshan hun milen chand niwale kaise

us ko daulat wo mili hai ki sambhaale kaise

ungliyan apni naginon se sajaane wale

tujh ko lagte hain mere hath ke chhaale kaise

ilm se pher lin tu ne jo nigahen apni

phir tere zehn mein phuTenge ujale kaise

dekhte rah gae pani ki rawani hum log

raste logon ne dariya mein nikale kaise

umr lag jati hai ek ghar ko banane mein hamein

makaDiyan roz hi bun leti hain jale kaise

tu ne 'aKHlaq' qasam khai thi zabt-e-gham ki

phir ye palkon pe nami honTon pe nale kaise