main wahshat-o-junun mein tamasha nahin bana

maiñ vahshat-o-junūñ meñ tamāshā nahīñ banā

sahrā mire vajūd kā hissa nahīñ banā

is baar kūza-gar kī tavajjoh thī aur samt

varna hamārī ḳhaak se kyā kyā nahīñ banā

soī huī anā mire aaḌe rahī sadā

koshish ke bāvajūd bhī kaasa nahīñ banā

ye bhī tirī shikast nahīñ hai to aur kyā

jaisā tū chāhtā thā maiñ vaisā nahīñ banā

varna ham aise log kahāñ Thahrte yahāñ

ham se falak kī samt kā ziina nahīñ banā

jitne kamāl-rañg the saare liye ga.e

phir bhī tire jamāl kā naqsha nahīñ banā

rokā gayā hai vaqt se pahle hī merā chaak

mujh ko ye lag rahā hai maiñ puurā nahīñ banā

main wahshat-o-junun mein tamasha nahin bana

sahra mere wajud ka hissa nahin bana

is bar kuza-gar ki tawajjoh thi aur samt

warna hamari KHak se kya kya nahin bana

soi hui ana mere aaDe rahi sada

koshish ke bawajud bhi kasa nahin bana

ye bhi teri shikast nahin hai to aur kya

jaisa tu chahta tha main waisa nahin bana

warna hum aise log kahan Thahrte yahan

hum se falak ki samt ka zina nahin bana

jitne kamal-rang the sare liye gae

phir bhi tere jamal ka naqsha nahin bana

roka gaya hai waqt se pahle hi mera chaak

mujh ko ye lag raha hai main pura nahin bana