makin yahin ka hai lekin makan se bahar hai

makīñ yahīñ kā hai lekin makāñ se bāhar hai

abhī vo shaḳhs mirī dāstāñ se bāhar hai

utar bhī saktā hai sartān kī tarah mujh meñ

vo ishq jo mire vahm-o-gumāñ se bāhar hai

savāl ye nahīñ mujh se hai kyuuñ gurezāñ vo

savāl ye hai ki kyuuñ jism o jaañ se bāhar hai

na jaane kaise tarāzū huā mire dil meñ

vo ek tiir jo terī kamāñ se bāhar hai

mire vajūd kā ā.īna pūchhtā hai mujhe

ye aks kab se tire ḳhāk-dāñ se bāhar hai

ḳhudā-gavāh vo is darja ḳhūb-sūrat thī

ki merā shauq-e-tamāshā bayāñ se bāhar hai

hamārī jeb meñ ḳhvāboñ kī rezgārī hai

so len-den hamārā dukāñ se bāhar hai

mirā amiin koī thā to vo mirā ham-zād

aur ab vahī mire pasmāñdgāñ se bāhar hai

'hasan' meñ hiddat-e-hijrāñ se jal bhī saktā huuñ

ki merā jism tire sā.ebāñ se bāhar hai

makin yahin ka hai lekin makan se bahar hai

abhi wo shaKHs meri dastan se bahar hai

utar bhi sakta hai sartan ki tarah mujh mein

wo ishq jo mere wahm-o-guman se bahar hai

sawal ye nahin mujh se hai kyun gurezan wo

sawal ye hai ki kyun jism o jaan se bahar hai

na jaane kaise taraazu hua mere dil mein

wo ek tir jo teri kaman se bahar hai

mere wajud ka aaina puchhta hai mujhe

ye aks kab se tere KHak-dan se bahar hai

KHuda-gawah wo is darja KHub-surat thi

ki mera shauq-e-tamasha bayan se bahar hai

hamari jeb mein KHwabon ki rezgari hai

so len-den hamara dukan se bahar hai

mera amin koi tha to wo mera ham-zad

aur ab wahi mere pasmandgan se bahar hai

'hasan' mein hiddat-e-hijran se jal bhi sakta hun

ki mera jism tere saeban se bahar hai