mausam ka aah-o-nala se andaza kijiye

mausam kā āh-o-nāla se andāza kījiye

taaza havā pe band na darvāza kījiye

yā chheḌiye na manzar-e-nādīdanī kā zikr

yā misl-e-āftāb baham ġhāza kījiye

yā lab pe lā.iye na pareshāniyoñ kī baat

yā jam.a baiTh kar kabhī shīrāza kījiye

bahlā.eñ dil ko ḳhvāb-e-ḳhush-ā.ind se na kyuuñ

kyā fā.eda ki zaḳhm-e-kuhan taaza kījiye

is daur meñ ki chehre hī 'anjum' hue haiñ masḳh

kyā ḳhatt-o-ḳhāl se tire andāza kījiye

mausam ka aah-o-nala se andaza kijiye

taza hawa pe band na darwaza kijiye

ya chheDiye na manzar-e-nadidani ka zikr

ya misl-e-aftab baham ghaza kijiye

ya lab pe laiye na pareshaniyon ki baat

ya jama baiTh kar kabhi shiraaza kijiye

bahlaen dil ko KHwab-e-KHush-aind se na kyun

kya faeda ki zaKHm-e-kuhan taza kijiye

is daur mein ki chehre hi 'anjum' hue hain masKH

kya KHatt-o-KHal se tere andaza kijiye