mere fikr o fan ko nai faza nae baal-o-par ki talash hai

mire fikr o fan ko na.ī fazā na.e bāl-o-par kī talāsh hai

jo qafas ko yaas ke phūñk de mujhe us sharar kī talāsh hai

hai ajiib ālam-e-sarḳhushī na shakeb hai na shikastagī

kabhī manziloñ se guzar ga.e kabhī rahguzar kī talāsh hai

mujhe us junūñ kī hai justujū jo chaman ko baḳhsh de rañg o bū

jo naved-e-fasl-e-bahār ho mujhe us nazar kī talāsh hai

mujhe us sahar kī ho kyā ḳhushī jo ho zulmatoñ meñ ghirī huī

mirī shām-e-ġham ko jo luuT le mujhe us sahar kī talāsh hai

yuuñ to kahne ke liye chārāgar mujhe be-shumār mile magar

jo mizāj-e-ġham ko samajh sake usī chārāgar kī talāsh hai

mire nāsehā mire nukta-chīñ tujhe mere dil kī ḳhabar nahīñ

maiñ harīf-e-maslak-e-bandagī tujhe sañg-e-dar kī talāsh hai

mujhe ishq husn o hayāt se mujhe rabt fikr o nashāt se

mirā sher naġhma-e-zindagī tujhe nauhagar kī talāsh hai

use zid ki 'vāmiq'-e-shikva-gar kisī raaz se na ho bā-ḳhabar

mujhe naaz hai ki ye dīda-var mirī umr bhar kī talāsh hai

mere fikr o fan ko nai faza nae baal-o-par ki talash hai

jo qafas ko yas ke phunk de mujhe us sharar ki talash hai

hai ajib aalam-e-sarKHushi na shakeb hai na shikastagi

kabhi manzilon se guzar gae kabhi rahguzar ki talash hai

mujhe us junun ki hai justuju jo chaman ko baKHsh de rang o bu

jo nawed-e-fasl-e-bahaar ho mujhe us nazar ki talash hai

mujhe us sahar ki ho kya KHushi jo ho zulmaton mein ghiri hui

meri sham-e-gham ko jo luT le mujhe us sahar ki talash hai

yun to kahne ke liye chaaragar mujhe be-shumar mile magar

jo mizaj-e-gham ko samajh sake usi chaaragar ki talash hai

mere naseha mere nukta-chin tujhe mere dil ki KHabar nahin

main harif-e-maslak-e-bandagi tujhe sang-e-dar ki talash hai

mujhe ishq husn o hayat se mujhe rabt fikr o nashat se

mera sher naghma-e-zindagi tujhe nauhagar ki talash hai

use zid ki 'wamiq'-e-shikwa-gar kisi raaz se na ho ba-KHabar

mujhe naz hai ki ye dida-war meri umr bhar ki talash hai