mushkil hai pata chalna qisson se mohabbat ka

mushkil hai pata chalnā qissoñ se mohabbat kā

andāza musībat meñ hotā hai musībat kā

hai naza.a ke aalam meñ bīmār mohabbat kā

mushkil hai sambhalnā ab bigḌī huī hālat kā

afsos ki ham so kar jaage bhī to kab jaage

marne pe khulā uqda jiine kī haqīqat kā

vo aa.e haiñ ḳhud apne dīvāne ko samjhāne

ai jazba-e-dil dekhā iqbāl mohabbat kā

ai chashm-e-haqīqat-bīñ dil kī hai bisāt itnī

ik chhoTā sā TukḌā hai ā.īna-e-hasrat kā

kyuuñ ishq ke jhagḌe ko le jaatā hai uqbā meñ

kar ḳhātma duniyā meñ duniyā kī musībat kā

ai 'qadr' hasīnoñ ko maiñ dil se na kyuuñ chāhūñ

jab husn-parastī bhī ik zauq hai fitrat kā

mushkil hai pata chalna qisson se mohabbat ka

andaza musibat mein hota hai musibat ka

hai naza ke aalam mein bimar mohabbat ka

mushkil hai sambhalna ab bigDi hui haalat ka

afsos ki hum so kar jage bhi to kab jage

marne pe khula uqda jine ki haqiqat ka

wo aae hain KHud apne diwane ko samjhane

ai jazba-e-dil dekha iqbaal mohabbat ka

ai chashm-e-haqiqat-bin dil ki hai bisat itni

ek chhoTa sa TukDa hai aaina-e-hasrat ka

kyun ishq ke jhagDe ko le jata hai uqba mein

kar KHatma duniya mein duniya ki musibat ka

ai 'qadr' hasinon ko main dil se na kyun chahun

jab husn-parasti bhi ek zauq hai fitrat ka